நடை முறை சிக்கல்

 

இன்று “ஒன்றரை ஷிப்ட்” வேலை பார்த்து விட்டு கிளம்பியதால் மணி பத்துக்கு மேல் ஆகி விட்டது.

இருளில் இரு பக்கமும் புதர்களாய் இருந்த பாதையில் சைக்கிளை அழுத்தி வந்து கொண்டிருந்த ‘ஸ்டீபன்’ சல சல வென சத்தம் வரவும், பயந்து போய் திரும்பி பார்த்தான்.

புதரின் ஒரு பக்கத்திலிருந்து அடுத்த புதருக்கு ஒரு உருவம் நடந்து போவது இவனது அறிவுக்கு அந்த இருளிலும் புலப்பட்டது.

யாரு? குரலில் பயம் இருந்தாலும் வீராய்ப்பாய் சைக்கிள் பெடலின் மேல் ஒரு காலும் தரையில் ஒரு காலையும் வைத்தவாறு கேட்டான்.

அப்படி ஏதாவது என்றாலும் சட்டென சைக்கிளை அழுத்தி பறந்து விடலாம்.

யாரு? யாரு? இரண்டு மூன்று முறை கூப்பிட்டும் பதிலில்லாததால், இப்ப வெளியே வர போறியா இல்லை நான் அங்க வந்தா அப்புறம் என்ன நடக்கும் தெரியுமா?

கேட்டாலும் இவன் கண்டிப்பாய் போய் பார்க்க போவதில்லை, குருட்டு தைரியத்தில் இந்த வார்த்தைகளை வீசினான்.

ஐந்து நிமிடத்தில் வெளியே வந்த உருவத்தை கண்டவுடன் மிரண்டு விட்டான், மேரி நீயா? இந்த நேரத்துல இங்க என்ன பண்ணறே?

அருகில் நடந்து வர வர அவள் அந்த இருளில் பயமாக தெரிந்தாள்.

என்னை மன்னிச்சிடுங்க, நான் ..நான்..விக்கி விக்கி அழுதாள்.

அழுகாதே, என்னாச்சு, இந்த நேரத்துல இப்படி புதரில இருந்து வந்தா என்ன நினைப்பாங்க, அக்கம் பக்கம் இருக்கறவங்க..

மத்தவங்க என்ன நினைச்சா என்ன? யாரு வருவாங்க எனக்கு உதவ?

ஏன் இப்படி பேசறே, என்னாச்சு உனக்கு, சரி பின்னாடி உட்காரு. வீடு பக்கந்தானே, கொண்டு போய் விட்டுடறேன்.

அதெல்லாம் வேண்டாம், இந்நேரம் உங்க சைக்கிள் பின்னாடி உக்காந்து வந்தா உங்களுக்குத்தான் பேர் கெடும்.

அதெல்லாம் அப்புறம் பாத்துக்கலாம், முதல்ல ஒரு வயசுப்பொண்ணு இப்படி தனியா வந்து நிக்கறதே தப்பு, அப்புறம் உன்னைய பார்த்துட்டு தனியா எப்படி போறது, நீ என் பின்னாடி உட்காரு.

கொஞ்சம் ‘பிகு’ செய்தவள் என்ன நினைத்தாலோ, பின்புற கேரியரில் ஏறி உட்கார்ந்து கொண்டாள். பெடலை அழுத்தினான்.

ஆனால், அவன் மனம் மேரி ஏன் இந்த இருளில் அதுவும் தனியாக புதருக்குள் இருந்து வருகிறாள்? உண்மையில் வேறு யாராவது உடன் இருந்திருப்பார்களோ, என்னை கண்டவுடன் அவர்கள் பதுங்கி கொண்டு எங்கே இவன் அங்கு வந்தால் காரியம் கெட்டு விடும் என்று இவளை அனுப்பி விட்டார்களோ?

அந்த குடியிருப்பில் ஒன்றிரண்டு வீடுகள் மட்டும் விளக்குகள் எரிந்து எதிர்பார்ப்புடன் காத்திருந்தனர்.

மேரி இவன் சைக்கிளில் இருந்து இறங்குவதை மேரியின் வீட்டிலிருந்து பார்த்து கொண்டிருந்த அவள் அம்மா வேகமாக் ஓடி வந்து எங்கே போனேடி? உன்னை ரொம்ப நேரமா தேடிகிட்டிருக்கோம், நீ என்னடான்னா.. ஸ்டீபனை முறைத்தவாறு அவளை அழைத்து போனாள்.

ஸ்டீபனுக்கு அப்பொழுதுதான் உறைத்தது, தான் அவசரப்பட்டு இவளை சைக்கிளில் கூட்டி வந்து விட்டோமோ?

ஸ்டீபனின் அம்மா இவன் அம்மா உள்ளே வந்தவுடன் “அறிவு கெட்டவனே” இவளை எங்கிருந்து கூட்டிட்டு வர்றே?

இல்லம்மா வர்றபோது அங்க நின்னுகிட்டிருந்தா, சரி தனியா ஏன் நடந்து வரணும்னு..இழுத்தான்.

ஆமா, நீ இதை நாளைக்கு வெளிய சொல்லு உன்னைய நம்புவானுங்க..

அம்மா புரியாம பேசாதே, மனிதாபிமானமா ஒரு உதவி அதுவும் மணி பத்து மணிக்குமேல ஆயிடுச்சு, கண்ணுல பாத்துட்டு சும்மா வர முடியுமா?

அவன் சொன்னதை அவள் காது கொடுத்து கேட்டதாக தெரியவில்லை, முணு முணுவென்று இரவு முழுக்க அவனை ‘வைது’ கொண்டிருந்தாள்.

இருந்ததை போட்டு சாப்பிட்டு படுத்த ஸ்டீபனுக்கு அம்மாவின் கோபம் புரிந்தது. உண்மைதானே, இந்த இரவு நேரத்தில் குடியிருப்பில் அவளை சைக்கிளில் கூட்டி வந்தது தவறோ?

அந்த இருளில் புதர்பக்கம் அவளுக்கு என்ன வேலை.? தான் அவ்வளவு நேரம் கூப்பிட்ட பின்னால்தானே வெளியில் வந்தாள்.. அப்படியானால். தெரியாமல் தான் சிக்கலில் மாட்டிக்கொண்டோமோ..

காலையில் எழுந்து வெளியில் நின்றபடி பல் விளக்கி கொண்டிருக்கும் போதே வீட்டு முன்பாக சென்று கொண்டிருந்த பாலன் என்ன “ஸ்டீபா” நேத்து ரொம்ப லேட்டா வந்த போலிருக்கு.

ஆமாண்ணே நேத்து ஒன்றரை ஷிப்ட் பார்த்துட்டு வந்தேன்.

நிசமாவா….! இந்த கொரானோ காலத்துல “எக்ஸ்ட்ரா டியூட்டி” கொடுக்கறாங்களா?

கேள்வியில் நக்கல் இருந்தது போல் அப்பொழுது உறைக்கவில்லை, அவர் போன பின்புதான் உறைத்தது.

இரவு நாம் கண்டு கொள்ளாமல் வந்திருக்கலாமோ.. தன்னை இரவு பார்த்திருப்பார், அல்லது யாராவது இதை பற்றி பேசியிருக்கலாம்.

சே..அம்மா கோபித்துக்கொண்டது சரிதான், நாம்தான் முட்டாள்தனம் பண்ணிவிட்டோம்.

இவர்கள் குடியிருப்பில் நூறு குடும்பங்கள் இருக்கும். முக்கால்வாசி பேர் பக்கத்தில் இருக்கும் சின்ன சின்ன கம்பெனிகளுக்கு வேலைக்கு போய்க் கொண்டிருப்பவர்கள். நகரை விட்டு தள்ளி இருக்கிறது. இதுவரை காடாய் இருந்த இந்த பகுதி சிறு சிறு குடியிருப்புக்கள் முளைக்க தொடங்கி அங்காங்கே நூறு நூறு குடும்பங்கள் இது போல இருந்தன.

ஸ்டீபனும் அம்மாவுடன் தன் ஊரை விட்டு இங்கு குடி வந்து இரண்டு மூன்று வருடங்கள் ஓடி விட்டது. மேரி குடும்பம் கூட அந்தளவுக்குத் தான் இருக்கும் இங்கு குடி வந்து.

இந்த நிகழ்ச்சி எப்படியோ கொஞ்சம் கொஞ்சமாக மறைய இரண்டு மூன்று மாதங்கள் ஒடியிருந்தது.

அன்று காலை எழுந்த போது ‘மேரியின்’ வீட்டில் ஒரே சத்தமாக இருந்தது. என்ன பிரச்சினை என்று அம்மாவிடம் கேட்கலாம் என்று நினைத்து அவளை பார்த்தான்.

அவள் முகம் சிவந்திருந்தது. கோபத்தில் இருப்பது போல் தெரிய, வேண்டாம் நாமே போய் பார்க்கலாம் முடிவு செய்து எழுந்து முகம் கை கால் கழுவி சட்டையை மாட்டினான்.

எங்கே போறே? அம்மாவின் குரலில் கர்ண கடூரம்?

இல்லே வெளியில சத்தம் கேட்டுச்சு, என்னன்னு பார்த்துட்டு வந்துடலாமுன்னு..

நீ எங்கியும் போக வேண்டாம், பேசாம வாயை மூடிட்டு கிட..அம்மாவின் குரலில் எரிச்சல்..

என்னாச்சு, ஏன் அம்மா எரிந்து விழுகிறாள்.

புரியாமல் அங்கேயே கீழே உட்கார்ந்து விட்டான். இன்று மதியம் ஷிப்ட்டுக்குத் தான் போகவேண்டும். அது வரை என்ன செய்வது, அம்மா வெளியே போக வேண்டாமென்கிறாள்.

மதியம் வேலைக்கு கிளம்பியவனிடம் சைக்கிளில் கூட வந்த அந்தோணி எல்லாவற்றையும் சொல்லி விட்டான். மேரி வீட்டில் ஏதோ பிரச்சினை. மேரி சொல்ல மாட்டேனெங்கிறாள், அவ அப்பா அம்மாவுக்கு உன் மேல்தான் சந்தேகம், நீ தான் அன்னைக்கு இராத்திரி அவளை கூட்டிட்டு வந்தியாமா? .

‘ஏசுவே’ இதென்ன சிக்கல், அதனால்தான் அம்மா காலையில் இருந்து கோபமாக இருந்திருக்கிறாள்:. எவ்வளவு பெரிய மடத்தனம் பண்ணியிருக்கிறேன்.

அப்படியானால் மேரியுடன் அன்று யாரோ இருந்திருக்க வேண்டும். சந்தர்ப்பம் தெரியாமல் தான் போய் சிக்கலில் மாட்டிக் கொண்டிருக்கிறேன்.

அன்று கம்பெனியில் அவனுக்கு வேலையே ஓடவில்லை. எப்பொழுது வேண்டுமானால் அவனை தேடி ஆள் வரலாம். அதுவும் கட்டி இழுத்து கொண்டு போய் அதற்கு மேல் நினைத்து பார்க்க இவனுக்கு ‘ஈரல் குலை’ எல்லாம் நடுங்கியது.

தான் எந்த தவறும் செய்யவில்லை, என்றாலும் அந்த பெண்ணை அன்று எல்லோரும் பார்க்க கூட்டி போய் இருக்கிறேன். அந்த பெண்ணோ வேண்டுமென்றே தன் பெயரை சொல்லி விட்டால், அப்புறம் தான் எவ்வளவு சொன்னாலும்..யார் நம்புவார்கள் ?

வேலை முடிந்து வீட்டுக்கு போலாம் என்று தெரிந்தும் இவனுக்கு வீட்டுக்கு போவதற்கே பயமாக இருந்தது. எங்கே எல்லாவற்றிற்கும் காரணம் “இவன்தான்” என்று சொல்லி விட்டால்..!

இருக்காது, இருந்திருந்தால் அம்மாவிடமிருந்து அழைப்பு வந்திருக்கும். இல்லை அக்கம் பக்கம் யாராவது வந்து இவனை அழைத்து போக வந்திருக்கலாம். இப்படி மனம் சமாதானமாய் சொன்னாலும் பயந்து பயந்துதான் சைக்கிளை வீட்டை நோக்கி மிதித்தான்.

குடியிருப்பு அமைதியாக இருந்தது. இவனை எதிர்பார்த்து நின்ற அம்மாவின் முகத்திலும் கோபம் சற்று குறைந்திருப்பது போல் தெரிந்தது.

வேண்டாம், எதுவும் கேட்க வேண்டாம் அவளாக சொல்லட்டும்.

முகம் கை கால் கழுவிவிட்டு அம்மா அவனை சாப்பிட கூப்பிட்டு சாப்பாடு போட்டாள். அவளுக்கு இவன் மேல் இருந்த கோபம் போய் விட்டது என்பதை உணர்ந்த ஸ்டீபன் அவளாக சொல்லட்டும் என்று மெளனமாய் சாப்பிட்டான்.

சாப்பிட்டு முடித்த பின்னால் மெளனமாய் கை கழுவ எழுந்தவனிடம், ‘நல்ல வேளை இங்க உன் பேருதான் எல்லார் வாயிலயும் உருண்டுகிட்டிருந்துச்சு. அந்த பொண்ணு மகராசி உண்மைய சொல்லிபுட்டா, அந்த பையன் வீட்டுக்கு போய் எல்லாம் நல்லபடியா முடிச்சுட்டு வந்துட்டாங்க. இனி மேலயாவது, எங்க எப்படி நடந்துக்கணும்னு தெரிஞ்சு நடந்துக்க..’

அம்மா தன்னிடம் சொன்னது அறிவுரையா, நடைமுறை சிக்கலையா?

இருந்தாலும் மேரியை வாழ்த்தத்தான் செய்தான்.

‘நல்லவேலையம்மா என்னை காப்பாத்திட்டே’ 

தொடர்புடைய சிறுகதைகள்
சுரேஷ் இப்பொழுது வலைதள வாசகர்களுக்கு நன்கு அறிமுகமான எழுத்தாளராகிவிட்டான்.அவனது கதைகளும் வலைதளத்தில் அடிக்கடி வெளியாகிக்கொண்டிருக்கின்றன. ஆனாலும் அவனுக்கு ஒரு எதிர்ப்பார்ப்பு தோன்றியது, கணினி உபயோகிப்பவர்கள் மற்றும் கை பேசி வைத்திருப்போரும் இவனது கதைகளை வாசிப்பது இவனுக்கு பெருமைதான் என்றாலும், அச்சில் வந்தாலும் ...
மேலும் கதையை படிக்க...
சூரியன் மறைய தொடங்கும் நேரம் ரங்கசாமியின் வியாபார அலுவலகத்தில், குளிரூட்டப்பட்ட அறையில் சுகமாக உட்கார்ந்து கொண்டிருந்த ரங்கசாமி தன் பெர்சனல் டெலிபோன் மணி அடிக்க, போனை எடுத்து ஹலோ.சொல்லி வாய் மூடுவதற்குள் இடி போல ஓசை ஒன்று கேட்டது, காதை உடனே ...
மேலும் கதையை படிக்க...
ஒரு அடர்ந்த காடு ஒன்று இருந்தது, அந்த காட்டுக்குள், கரடி ஒன்று குடும்பத்துடன் வாழ்ந்து வந்த்து. தாய்க்கரடி தினமும் குட்டிகளை விட்டு விட்டு உணவுக்காக வெளியே அலைந்து திரிந்து, மீன், தேனடை,பழங்கள் போன்றவகைகளை, குட்டிகளுக்கு கொண்டு வந்து கொடுத்து தானும் உண்டு, ...
மேலும் கதையை படிக்க...
அது மலைகள் சூழ்ந்த கிராமம்.ஏதோ பிளஸ் டூ படித்துவிட்டாலே பெரிய படிப்புதான் அந்த ஊருக்கு, அந்த படிப்பு முடித்தவர்கள் ரோட்டோரம் திண்ணையில் உட்கார்ந்திருப்பதை பார்த்தவுடன் தொ¢ந்து கொள்ளலாம் அவர்கள் எல்லாம் அந்த ஊரில் பொ¢ய படிப்பு படித்தவர்கள். இதில் ஒரு சில ...
மேலும் கதையை படிக்க...
அரசாங்க அலுவலகம் ! கை கட்டி நின்று கொண்டிருந்தார் அருணாசலம், சார் தயவு செய்து அந்த லோனை பாஸ் பண்ணி கொடுங்க, பையனுக்கு காலேஜூல செமஸ்டர் பீஸ் கட்டியாகனும். இதை கேட்பதற்குள்ளே கண்ணீர் விட்டு விடுவார் போலிருந்தது. எதிரில் நாற்காலியில் உட்கார்ந்திருந்த மாரியப்பனுக்கு ...
மேலும் கதையை படிக்க...
ஏதோ ஒரு திரைப்படத்தின் படப்பிடிப்பு நடந்து கொண்டிருந்தது. அங்கு குழுமியிருந்த அனைவரிலும், கதாநாயகன், நாயகி இருவர் உட்பட அனைவரையும் விட அந்த லைட்பாய் கவனத்தை கவர்ந்தான். சில நேரங்களில் நாயகியின் பார்வை அந்த பையனை நோக்கி செல்வதை கதாநாயகனாக நடிப்பவர் பொறாமையாக ...
மேலும் கதையை படிக்க...
தேதி:2/01/1971 அன்புடையீர் வணக்கம்! இந்தக்கடிதம் கண்டவுடன் நீங்கள் யார் எழுதியது என குழம்பிக்கொள்ள வேண்டாம். போன வாரம் வெள்ளிக்கிழமை எங்கள் வீட்டிற்கு வந்து பஜ்ஜி, வடை, காப்பி சாப்பிட்டுவிட்டு காரம் கொஞ்சம் தூக்கல் என்று அந்தக் கூட்டத்தில் உமது அம்மையார் ஏதோ பெரிய ...
மேலும் கதையை படிக்க...
உங்க அப்பா வந்திருக்காரு ! முகத்தை கடு கடுவென வைத்தவாறு ராமனாதனிடம் சொல்லிக்கொண்டிருந்தாள் பார்கவி, அப்பொழுதுதான் குளித்து முடித்து துண்டை கட்டிக்கொண்டு வெளியே வந்திருந்தார். ராமனாதனுக்கும் எரிச்சலாய் வந்தது, என்ன மனுசன், அப்படி என்ன பணத்தேவை இவருக்கு வந்து விடுகிறது. அம்மாவும், இவரும்தான், ...
மேலும் கதையை படிக்க...
காலையிலிருந்து நல்ல சவாரி கிடைத்துக்கொண்டிருந்த்து சரவணனுக்கு. இப்படியே பத்து இருபது நாட்கள் கிடைத்தால் சம்சாரத்தின் “பிரசவ” செலவை ஈடு கட்டி விட முடியும் என்று மனதுக்குள் நினைத்துக்கொண்டவனை யாரோ கையை தட்டி கூப்பிடும் சத்தம் கேட்டவுடன் அனிச்சையாய் திரும்பி பார்த்தான். கை தட்டி ...
மேலும் கதையை படிக்க...
அன்று என் கையைப்பிடித்து என்ன அழகான கைகள் உனக்கு என்று சொன்ன நீங்களா, என் கையைப்பிடித்து இழுத்து கீழே தள்ளினீர்கள், விழுந்து தலையில் அடிபட்டு மயங்கி கிடந்த என்னை சிறிதும் லட்சியம் செய்யாமல் வேகமாக சென்றுவிட்டீர்களே, கொஞ்சம் கூட படிப்பறிவு இல்லாமல் ...
மேலும் கதையை படிக்க...
எழுத்தாளன் வியாபாரி ஆகிறான்
உன் மகன் கடத்தப்பட்டான்
ஏமாற்றி பிழைக்க நினைத்த நரி
இளமைக்காலத்தில் வந்து மறைந்த சமுதாய சிந்தனைகள்
மனைவியின் கம்மல்
இலட்சியமும் யதார்த்தமும்
அது அந்தக்காலம்
அப்பாவின் கணிப்பு
இன்னும் மறைந்து விடவில்லை மனிதாபிமானம்
வாசம் இழந்த மலர்

Leave a Reply

Your email address will not be published. Required fields are marked *

* Copy This Password *

* Type Or Paste Password Here *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Enable Google Transliteration.(To type in English, press Ctrl+g)