நேற்று போல் இன்று இல்லை

பள்ளியில் கணக்கு வாத்தியாரிடம் கடுமையாக தண்டனை வாங்கும் மாணவன், கணக்கு வாத்தியார் காணாமல் போக மாட்டாரா என்று ஏங்குவது போல், சங்கருக்கு வந்த கோபத்தில் அவன் மேனேஜர் ராமச்சந்திரன் எப்படியாவது ஒழிந்தால் சரி என்று விரக்தியின் விளிம்பிற்கு தள்ளப்பட்டான்.

ராமச்சந்திரனின் உத்தரவுக்கிணங்க அவர் சொல்வதையெல்லாம் முழுமையாக செய்தாலும் அவர் சங்கரை ” இந்த விஷயத்தில் இப்படி செய்திருக்க வேண்டும்” “அந்த கஸ்டமரை அப்படி ஹாண்டில் பண்ணியிருக்க வேண்டும்” என்று ஆயிரம் அறிவுரைகள்.

புஸ்தகத்தில் படிக்கும் “கேஸ் ஸ்டடிஸ் ” “கஸ்டமர் நடத்தை”, “கஸ்டமர் சைக்காலஜி ” எல்லாம் நிஜ வாழ்க்கையில் அப்படியே பிரதிபலிப்பதில்லை என்பது ராமச்சந்திரனுக்கு தெரிந்திருந்தும், தான் மானேஜர், என்ற தோரணையில் அந்த உயர்விடத்திலிருந்து புத்திமதிகள் புகட்டிகொண்டேயிருப்பார்! போதாக்குறைக்கு அவர் கம்பெனி முதலாளிக்கு தூரத்து சொந்தம்!

கம்பெனியை விட்டு விலகி வேறு வேலையில் சேரலாம் என்றால் , கொரோனாவுக்குப் பின்யுகத்தில் வேலை கிடைப்பது குதிரைக்கொம்பு, அதிலும் இப்போதைய உயர் சம்பளம், அலவன்ஸ், எல்லாம் புதிய வேலையில் கானல் நீர்!

காரை ஒட்டிக்கொண்டிருந்த சங்கரின் மனதில் சஞ்சலங்கள்; ஆற்காட் சாலையில் ஏற்கனவே ஏகப்பட்ட டிராபிக் நெரிசல்கள்; மெட்ரோ பணியால் கொத்து பரோட்டாவான ரோட்டில் மக்கள் டூவீலர்களில் முதுகு வலி, உடல் வலி வர, குதித்து, குதித்து, மேடு, பள்ளம், தெருப்புழுதி, புகை எல்லாம் ஜாக்கிரதையாக சமாளித்து அவரவர் அவரவர் இடத்திற்கு விரைந்து கொண்டிருந்தனர்.

வழியில், வட பழனி சிக்னல் அருகில், கார் டயர் பஞ்சர் ஆகி சாலையில் நின்றுகொண்டு மொபைல் போனில் மெக்கானிக்கை வரச்சொல்லிக்கொண்டிருந்தார் ராமச்சந்திரன்!

ஆயிரம்தான் இருந்தாலும், தன் மானேஜரை பார்த்து விட்டு சடன் பிரேக் போட்டு காரை அவர் அருகில் நிறுத்தினான் சங்கர். மானேஜரை நோக்கி, “சார்! என் காரில் ஏறிக்கொள்ளுங்கள்! நாம் ஆபிஸ் போய், நம் கம்பெனி மெக்கானிக்கை அனுப்பி, கார் டயர் பஞ்சர் சரி செய்து விடலாம்” என்றான்.

ராமச்சந்திரனும் கடும் வெய்யிலிலும், புழுதிப்படலத்திலும், டிராபிக் ஜாமிலும் வெகு நேரம் நின்று களைத்திருந்ததால், சங்கர் சொல்வது சரி என்று, காரில் அமர்வதற்கு கார் கதவை, கடும் வாகன ஓட்டத்திற்கிடையில் திறந்தார்.

ஓ! காட் ! அந்த நேரம் பார்த்து பின்னால் வந்த செங்கல் லோடு ஏற்றிவந்த மஞ்சள் லாரி ஒன்று, கட்டுப்பாட்டை இழந்து ராமச்சந்திரன் மீது மோதி, அவர் தூக்கி எறியப்பட்டு அருகில் இருந்த மின் கம்பத்தில் தலை அடிபட்டு அகோரமாக ரத்த வெள்ளத்தில் அகால மரணம்!

சங்கர் ஸ்தம்பித்து , மீண்டு, காரிலிருந்து இறங்கி அவரை நோக்கி ஓடினான். அதற்குள் கூட்டம் கூடி அவரவர் தங்கள் வருத்தத்தை அருகில் நின்ற பெயர் தெரியாத மற்ற மனிதர்க்கு தெரிவித்து விட்டு நகர்ந்தனர். நல்லது செய்யப்போய், நாமே அவர் மரணத்திற்கு காரணம் ஆகிவிட்டோமே என்று வருந்தினான் சங்கர்.

ராமச்சந்திரன் இல்லா ஆபீஸ் உலகம் அதன் வணிகக்கூர்மையை இழந்தது. நாளாக நாளாக , சங்கரின் விற்பனைத்திறன் குறைந்து அவனால் சரிவர “வணிகக்குறிக்கோள்” எனப்படும் டார்கெட்களை அடைய முடியாமல் அவன் பணித்திறன் மங்கி, மழுங்கி அற்புத சேல்ஸ்மேன் என்ற பீடத்திலிருந்து ஆவெரேஜ் சேல்ஸ்மேன் ஆனான். ராமச்சந்திரன் இருக்கும்வரை ஒரு சில கணங்களில் அவர் இறக்கவேண்டும் என்று வக்கிர ஆசைப்பட்ட சங்கர், அவர் இறந்த பின்பு அவர் இருப்புக்காக ஏங்கினான்.