Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

சாதிக்குப் போடு மூடி…!

 

‘ சொல்லவா. . கூடாதா. .? சொன்னால் தாங்குவாரா. .. அதற்காகச் சொல்லாமல் விடுவது சரியா. .??! ‘ என்று ரொம்பவே குழம்பிய கமலம் கணவர் தலையைக் கண்டதும் துணிந்தாள்.

வெளியிலிருந்து உள்ளே நுழைந்த மோகனரங்கம்…

” அப்பாடா. ..! ” என்று சாய்வு நாற்காலியில் அமர்ந்தார்.

” என்னங்க. ..? ” கமலம் மெல்ல அழைத்து அவர் முன் நின்றாள்.

” என்ன. .? ” ஏறிட்டார்.

” ஒ . …ஒரு சேதி. ..”

” சொல். .? ”

” மா. .. மாப்பிள்ளை வீட்டிலேர்ந்து தொலைபேசியில் பேசினாங்க. ..”

” என்ன. .? ”

” கொஞ்சம் அதிர்ச்சியான விசயம். ..”

” ரொம்ப அதிர்ச்சின்னா குண்டை மெதுவா போடு. ..”

” வந்து. .. வந்து. …”

” சொல்லுடி. .! ” அதட்டினார்.

” பொண்ணு வேணாம். நிச்சயம் செய்யிற தேதியில நிச்சயம் வேணாம். நிறுத்திடுங்கன்னு சொன்னாங்க. ..”

மோகனரங்கத்திற்கு அதிர்ச்சியாகத்தானிருந்தது. தாங்கிக் கொண்டார்.

” ஏன். …? ” ஏறிட்டார்.

” உண்மை தெரிஞ்சி போச்சி. சாதி, மதம் தெரியாத பொண்ணு வேணாமாம். உங்களுக்கும் சேதி சொல்லச் சொல்லி சம்பந்தி கண்டிச்சுட்டார். ”

மோகனரங்கத்திற்கும் கமலத்திற்கும் பத்து ஆண்டுகளாய் குழந்தை இல்லை. எல்லா முயற்சிகளும் எடுத்து இறுதியாய் முடியாது என்று தெரிந்த போது அனாதை ஆசிரமம் சென்று அப்போதுதான் பிறந்து புதிதாக வந்த பெண் குழந்தையைஒன்றை முறையாகத் தத்தெடுத்து வந்து வளர்த்தார்கள். இப்போது பிரச்சனை. !

சிறிது நேரம் யோசனையுடன் இருந்த மோகனரங்கம் சிறிது நேரத்தில் முகம் தெளிந்து ஒரு முடிவுடன் எழுந்தார்.

” வெளியில போயிட்டு வர்றேன். .” மனைவியின் பதிலை எதிர்பாராது கிளம்பினார்.

” எங்கேயும் தகராறு வேணாம். ..! ” கமலம் உரக்கச் சொல்லியும் அவர் காதில் வாங்கவில்லை.

இரு சக்கர வாகனத்தை எடுத்தார். நேரே சம்பந்தி வீட்டில்தான் இறங்கினார்.

நல்ல வேளையாக கணவன் மனைவி தணிகாசலமும் தாமரையும் இருந்தார்கள்.

ஆளை பார்த்து கொஞ்சம் திடுக்கிட்டாலும். ..

” வாங்க. ..வாங்க. .” வரவேற்றார்கள்.

” உட்காருங்க. .” தணிகாசலம் சொன்னதும். ….

” இதோ…. காபி எடுத்து வர்றேன். .” தாமரை உள்ளே சென்றாள்.

காபி வரும்வரை மெளனமாக இருந்த மோகனரங்கம் அது குடித்து முடித்ததும். …

”நிச்சயம் வேணாம்ன்னு சொன்னீங்களாம். ..” பேச்சை ஆரம்பித்தார்.

” ஆமாம். .”

தாமரை கணவன் அருகில் அமர்ந்தாள்.

” காரணம். .? ”

” அதான் தொலைபேசியில் சொன்னேனே. .”

” வீட்டுக்காரி சொன்னாள். பொண்ணோட வாழ்க்கை. பேசியது நின்னு போனா அவ மனசை வேறு பாதிக்கும். நாங்க உண்மையைச் சொல்லாமல் சொந்த பொண்ணா வளர்த்துட்டோம். உங்க முடிவை மறுபரிசீலனை செய்யுங்க. யோசனை பண்ணி சொல்லுங்க…”

” யோசனைக்கே வேலை இல்லே .எங்க முடிவுல மாத்தமில்லே. விஷயம் முன்னாடியே தெரிஞ்சிருந்துன்னா நாங்க பெண் பார்க்கவே வந்து இருக்க மாட்டோம். நீங்களும் மறைச்சுட்டீங்க. .” தணிகாசலம் திடமாக சொல்லி வந்தவர் மீதே குற்றம் சுமத்தினார்.

” அது அனாவசியமுன்னு நெனைச்சேன். …” இழுத்தார்.

” அனாவசியமில்லே. அவசியம். ! விடுங்க. பேச்சு முடிஞ்சு போச்சு. ” வெட்டினார்.

மோகனரங்கம் அசரவில்லை. எழவும் இல்லை.

” நீங்க என்ன சாதி. .? ” அமைதியாய்க் கேட்டார்.

‘ இது வம்பு ! ‘ – தணிகாசலத்திற்குப் புரிந்தது.

உள்ளுக்குள் துணுக்குற்றாலும் வெளிக் கட்டிக்க கொள்ளாமல், ‘வந்ததை சமாளித்துதானே ஆகவேண்டும் ! ‘ என்கிற முடிவில். .. தன் சாதியைச் சொன்னார்.

” தங்கச்சி. ..? ” மோகனரங்கம் தாமரைப் பார்த்தார்.

” என் சாதி தான். ! ” – தணிகாசலம் பதில் சொன்னார்.

” உங்க தோட்டத்து வேலையாள் என்ன சாதி. .? ”

‘ இது என்ன சம்பந்தா சம்பந்தமில்லாத கேள்வி ! ” என்று நினைத்து குழம்பி…..

” அவன் வேற சாதி. ..” சொன்னார்.

” அவனுக்கும் உங்களுக்கும் … ஏன் நம்ப எல்லோருக்குமே ஏதாவது சாதி அடையாளம் இருக்கா. .? ” மோகனரங்கம் கேட்டு அவர்களை உற்றுப் பார்த்தார்.

கணவன் மனைவி விழித்தார்கள்.

” சாதியாலோ மதத்தாலோ மனுசனுக்கு எந்த அடையாளமுமில்லே. கடவுள் வைக்கவே இல்லை. அப்புறம் ஏன்யா அதை பிடிச்சிக்கிட்டுத் தொங்குறீங்க. ..?! ” மோகனரங்கம் கொஞ்சம் காட்டமாக கேட்டார்.

தணிகாசலம் தாமரை பதில் சொல்லவில்லை.

‘ எப்படி சொல்ல முடியும். ..? ‘

” சரி விடுங்க. உங்க பையன். . அதாவது மாப்பிள்ளை எங்கே பிறந்தார். ..? ”

” இந்த ஊர் அரசு பொது மருத்துவமனையில். .” தணிகாசலம் எதற்காக இந்த கேள்வி என்று நிதானித்து பொறுமையாக பதில் சொன்னார்.

” தினம் அங்கே எத்தினி பிரசவம் நடக்கும். ..? ”

” கணக்கு வழக்குக் கிடையாது. நான் பிரசவிக்கும் போதே ரெண்டு பேர் பிரசிவிச்சாங்க. எல்லாம் ஆம்பளைப் புள்ளைங்க. ” தாமரை பெருமையாக சொன்னாள்.

” பையன் உங்க சொந்தக் குழந்தையாய் இல்லாம…மத்தவங்க பெத்த அந்தக் குழந்தைகள்ல ஒன்னா ஏன் இருக்கக் கூடாது. …? ”

” ஐயா. .” இருவரும் அலறினார்கள். திடுக்கிட்டாகள் .

” பிரசவம் பார்த்த நர்சுகள், குழந்தைகளைக் குளிப்பாட்டி சுத்தம் செய்யும் போது தெரிஞ்சி மாத்தி இருக்கலாம். தெரியாமலும் மாத்தி இருக்கலாம். இல்லியா ..?..”

இருவருக்கும் திக்கென்றது. ஒருவரை ஒருவர் பார்த்து விழித்தார்கள்.

” நடக்க வாய்ப்புண்டா இல்லியா. ..? ” மோகனரங்கம் விடாமல் கராறாகக் கேட்டார்.

” உ. ….உண்டு. ..” இழுத்த தணிகாசலம்…..

” என் குழந்தை மாறல. அவன் என் ஜாடையில் இருக்கான். ” சொன்னார்.

” உலகத்துல அச்சு அசலாய் ஒரே உருவத்துல ஏழு பேர் இருக்கிறது என்பது அறிவிக்கப்பட்ட உண்மை ! இது ரகசியம் இல்லே. எல்லோருக்கும் தெரிந்த சேதி. எல்லா தாய்மார்களும் உங்ககிட்ட வந்துதான் பெத்தாங்களா. ..? நீங்கதான் தந்தையா. .? இல்லே நீங்க ரெண்டு பேரும்தான் மத்தவங்களுக்கு வித்தீங்களா. ..? ”

‘ இவர் என்ன இப்படி ஏடாகூடமாய் பேசுகிறார் ! ? ‘தணிகாசலம், தாமரை நினைத்தார்கள்.

” அங்க அடையாளங்களை வச்சு இது என் குழந்தைன்னு சொல்றது தப்பு. குழந்தை மாறலைன்னு நினைக்கிறதும் தவறு, மடத்தனம். ! மரபணு சோதனை மூலம்தான் அவன் உங்க குழந்தைன்னு நிரூபிக்க முடியும். இல்லாத பட்சத்துல எப்படி நிருபிப்பீங்க. இன்னைய வரைக்கும் மாப்பிள்ளையை உங்க குழந்தையாய் வளர்த்துட்டீங்க. நாளை மரபணு சோதனையில் அவர் உங்க குழந்தை இல்லேன்னா என்ன பண்ணுவீங்க. …? ”

தணிகாசலமும் தாமரையும் திக்கு முக்காடி திணறினார்கள்.

” இதுல புருஷனுக்குப் பொறுக்காத குழந்தைங்க வேற இருக்கு. .! ” சொல்லி மோகனரங்கம் ஒரு அணுகுண்டையும் வெடித்தார்.

தம்பதிகள் ஆடிப் போய் சிதறினார்கள்.

” ஐயா. .! பெத்தத் தாய்க்கு மட்டும்தான் ‘ ‘கரு ‘ எவரால் உருவானதுன்னு தெரியும். அவ பெத்த குழந்தையும் தன் குழந்தைன்னு நிரூபிக்க வாய்ப்பில்லே. காரணம் மாற்றம் ! ”

” சம்பந்தி ! எந்த குழந்தையும் சாதி, மதம், குலம், கோத்திரம் பார்த்து பிறக்கிறதில்லே. அது இருக்கிற இடத்தைப் பொறுத்துதான் எல்லாம் அமையுது. அப்படித்தான் என் பொண்ணும் பிறந்தாள். என் வளர்ப்பில் நம் சாதி சனம் ஆனாள். இப்போ நாம பேசினபடி சம்பந்தி ஆகலாமா. … கூடாதா, முடியுமா முடியாதா !.? ” கேட்டு பார்த்தார்.

” சம்பந்தி ஆகலாம்ங்க. ..” கணவன் மனைவி இருவரும் சேர்ந்து சொன்னார்கள்.

மோகனரங்கம் முகத்தில் மலர்ச்சி !. 

தொடர்புடைய சிறுகதைகள்
பத்துப் பதினைந்து ஆண்டுகளுக்குப் பின் ரகுராமனை இவ்வளவு அருகில், நெருக்கத்தி;ல் பார்ப்பேனென்று நான் கொஞ்சமும் எதிர்பார்க்கவில்லை. அதே சமயம்.... இவன் அவன்தானா....என்கிற ஐயம் மனதுக்குள் சடக்கென்று தோன்ற.... எதிரி;ல் வந்த அவனை உற்றுப் பார்த்தேன். அவனேதான்..! கால இடைவெளி வளர்ச்சியில் கொஞ்சம் ...
மேலும் கதையை படிக்க...
சொத்துத் தகராறில்லை. பாகப்பிரிவினை. அந்த பங்களா வீட்டிற்கு முக்கிய உறவு, வேண்டியப்பட்டவர்களெல்லாம் வந்திருந்தார்கள். பஞ்சாயத்திற்கென்று ஊரிலுள்ள பெரிய மனிதர் பரமசிவமும் வந்திருந்தார். அந்த குடும்பத்திற்குப் பெரியப்பாவான தர்மராசாவும் வந்திருந்தார். பாகப்பிரிவினைக்கு உள்ளான சோமு, ராமு, பாலு, அவரவர் மனைவி மக்கள், முத்து இருந்தார்கள். சிக்கல்.... ...
மேலும் கதையை படிக்க...
சுவேதா ஸ்கூட்டியைக் கொண்டு வந்து வாசலில் நிறுத்த.... அதிலிருந்து இறங்கிய கணவர் சுரேசைப் பார்த்த பூமிகாவிற்குள் சின்ன அதிர்ச்சி. 'போகும்போது இவர்தானே ஒட்டிக்கொண்டு சென்றார். வரும்போது எதற்கு இந்த மாற்றம்.? ' திடீர் கேள்வி. சின்னப் பெண். அதுவும் வீட்டிற்கு விருந்தாளியாக வந்த இவள் ...
மேலும் கதையை படிக்க...
அலுவலகத்திற்குச் செல்லும் திவ்யாவைக் கண்ட ஆதவன் முகத்தில் மின்னல் மலர்ச்சி. அவள் அருகில் வண்டியை நிறுத்தி, ''ஒரு உதவி...? '' என்றான். ''சொல்லுங்க ? '' ''போற வழியில உள்ள தபால் பெட்டியில இந்த கவரை சேர்க்கனும்.'' நீட்டினான். ''கண்டிப்பா...'' கை நீட்டி வாங்கி நடந்தாள். நாலடி நடந்தவள் ...
மேலும் கதையை படிக்க...
வீட்டு முன் உள்ள தோட்டத்து மரத்தடியில் நாற்காலி போட்டு அமர்ந்து, தினசரியை விரித்துப் படித்துக்கொண்டிருந்த தணிகாசலம் முன் உள்ள நாற்காலியில் வாட்டமாக வந்து அமர்ந்தான் அவரின் பெரிய மகன். பெயர் சேகர். வயசு 27. ‘எம்.பி.ஏ. படிப்பு. நல்ல உத்தியோகம். கை நிறைய ...
மேலும் கதையை படிக்க...
பாரதி பையன்…!
சோடைக்குச் சொத்து..!
எதுக்கு இப்படி?
யோசனை! – ஒரு பக்க கதை
காதல் முடிச்சு!

சாதிக்குப் போடு மூடி…! மீது ஒரு கருத்து

  1. யோகராணி கணேசன் says:

    மௌனமாக இருந்துவிட்டால் மௌனித்தே போகிறது பல விடயங்கள். எதையும் பேசித்தீருங்கள் என்பதையும் சொல்லாமல் சொல்லிச் சென்றிருக்கிறார் எழுத்தாளன். நன்று

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Enable Google Transliteration.(To type in English, press Ctrl+g)