மகாசூன்யச் சுழல்

பாகம் – 1 | பாகம் – 2

பாகம் 1: அறுபட்ட மந்திரம்

மழை பெய்யாத அந்த இரவு, சிதம்பரத்தின் வானம் மட்டும் விசித்திரமான ஊதா நிறத்தில் மின்னிக் கொண்டிருந்தது.

நகரின் ஒதுக்குப்புறமான அந்தப் பழைய பங்களாவிற்குள் நுழையும்போது, துப்பறியும் அதிகாரி ஆதித்யாவுக்கு ஏதோ ஒன்று தவறாக நடப்பது புரிந்தது. வாசலில் காவலுக்கு இருந்த இரண்டு பெரிய வேட்டை நாய்களும் சத்தமே இல்லாமல் செத்துக் கிடந்தன. அவற்றின் உடலில் ஒரு கீறல் கூட இல்லை, ஆனால் கண்கள் மட்டும் பிதுங்கி உறைந்து போயிருந்தன.

வீட்டின் உள்ளே ஹாலில், அந்தப் பயங்கரம் அரங்கேறியிருந்தது. பிரபல தொல்பொருள் ஆய்வாளர் டாக்டர் விசுவநாதன், தன் பூஜை அறையிலேயே பிணமாகக் கிடந்தார். அவர் கழுத்து ஏதோ ஒரு கூர்மையான ஆயுதத்தால் அறுக்கப்பட்டிருந்தது.

ஆனால், விசித்திரம் அதுவல்ல… அவர் உடலில் இருந்து சொட்டிய ரத்தம் தரையில் படராமல், ஒரு குறிப்பிட்ட வடிவத்தில் தானாகவே கோடுகளாக ஓடி, ஒரு மர்மமான வட்டத்திற்குள் சிக்கியிருந்தது.

“சார்… இது என்ன இது?” என்றான் கான்ஸ்டபிள் மாறன் நடுக்கத்துடன்.

ஆதித்யா குனிந்து பார்த்தார். அந்த ரத்தக் கோடுகள் ஒரு விசித்திரமான வரைபடத்தை உருவாக்கியிருந்தன. அது ஒரு புரியாத வடிவிலான சக்கரம். அந்தச் சக்கரத்தின் நடுவில், டாக்டர் விசுவநாதனின் துண்டிக்கப்பட்ட நாக்கு வைக்கப்பட்டிருந்தது.

“இது கொலை இல்ல மாறன்… இது ஏதோ ஒரு மாபெரும் சடங்கு. சக்கரம் முழுமையடைய அந்த டாக்டரோட நாக்கு தேவைப்பட்டிருக்கு. அவர் எதையோ சொல்லப் போக, அதை தடுத்திருக்காங்க!” என்றார் ஆதித்யா.

திடீரென, அந்த ரத்தச் சக்கரத்தில் இருந்த ‘சி’ என்ற எழுத்து மட்டும் பிரகாசமாக ஜொலித்தது. அடுத்த நொடி, அறையில் இருந்த மின்விளக்குகள் வெடித்துச் சிதறின.

இருளுக்குள் ஒரு மெல்லிய சலங்கை சத்தம் கேட்டது. ‘ஜல்… ஜல்…’

ஆதித்யா தன் டார்ச் லைட்டை அடித்தார். அங்கே யாரும் இல்லை. ஆனால், சுவரில் இருந்த ஒரு பழைய நிலக்கண்ணடியில், ஆதித்யாவின் உருவத்திற்குப் பின்னால் ஒரு நீண்ட ஜடை கொண்ட, உடல் முழுவதும் திருநீறு பூசிய ஒரு உருவம் தெரிந்தது. ஆதித்யா சட்டெனத் திரும்பினார். அங்கே யாரும் இல்லை!

அப்போது விசுவநாதனின் மேஜையில் இருந்த போன் ‘பீப்’ என்று ஒலித்தது. ஒரு மெசேஜ் வந்திருந்தது.

“முதல் முடிச்சு அவிழ்ந்தது. இன்னும் நான்கு உயிர்கள்… சக்கரம் சுழலத் தொடங்கும்.”

ஆதித்யா அந்தச் சக்கரத்தை உற்றுப் பார்த்தார். அதில் மொத்தம் ஐந்து எழுத்துக்கள் இருக்க வேண்டும். இப்போது ‘சி’ என்ற எழுத்தில் மட்டும் ரத்தம் காய்ந்து கருப்பாக மாறியிருந்தது. அப்படியானால், இன்னும் நான்கு கொலைகள் நடக்கப்போகிறதா?

அதே சமயம், ஆதித்யாவின் சட்டைப் பையில் இருந்த அவருடைய பூர்விகத் தங்கச் சங்கிலி பயங்கரமாகச் சூடேறியது. அவர் அதை எடுத்துப் பார்த்தபோது, அதில் இருந்த ஒரு சிறிய பதக்கத்தில் அந்த மர்மச் சக்கரத்தின் ஒரு பகுதி மட்டும் செதுக்கப்பட்டிருந்தது.

“என் குடும்பத்துக்கும் இதுக்கும் என்ன சம்பந்தம்?” என்று ஆதித்யா யோசிக்கும்போதே, வீட்டின் பின்புறம் இருந்த கிணற்றில் இருந்து ஒரு பெரும் புகை மூட்டம் கிளம்பியது.

அந்தப் புகைக்கு நடுவே, ஒரு மனிதனின் அலறல் சத்தம் கேட்டது. அது டாக்டர் விசுவநாதனின் குரல் போலவே இருந்தது! ஆனால் அவர் தான் அங்கே பிணமாகக் கிடக்கிறாரே?

ஆதித்யா கிணற்றை நோக்கி ஓடினார். அங்கே அவர் கண்ட காட்சி, அவர் வாழ்நாளில் பார்த்திராத ஒன்று. கிணற்றுத் தண்ணீருக்குப் பதில், அங்கே ஆயிரக்கணக்கான தேள்கள் ஒன்றன் மேல் ஒன்றாக ஊர்ந்து, ஒரு மனித உருவமாக மாறிக் கொண்டிருந்தன.

அந்த உருவம் பேசியது: “ஆதித்யா… உன் ரத்தத்தில் இருக்கும் ரகசியத்தைத் தேடித்தான் வந்திருக்கிறேன். அந்தச் சக்கரத்தின் மையப்புள்ளி நீதான்!”

நமசிவாய,

பாகம் 1 முடிந்தது.