கோவிலூர் செல்வராஜன் – ஒரு ஈழத்து பாடகர், நடிகர், கவிஞர் மற்றும் பத்திரிகை ஆசிரியர். இலங்கை வானொலியில் நிகழ்ச்சி தயாரிப்பாளராகவும்,பல்துறைக் கலைஞராகவும் இருந்தவர்.
இவரது இயற்பெயர் செல்வராஜன் இராசையா. இவர் கிழக்கு மாகாணம்,அம்பாறை மாவட்டத்தில் வரலாற்று சிறப்புமிக்க திருக்கோவில் என்னும் ஊரிலே 18.09.1952 ல் பிறந்தவர். ஆரம்பக் கல்வியை திருக்கோவில் மெதடிஸ்த மிசன் பாடசாலையிலும்,பாடசாலைக் கல்வியை திருக்கோவிலில் இருக்கும் தம்பிலுவில் மகாவித்தியாலதிலும் உயர் கல்வியை மட்டக்களப்பிலும், கற்று பேராதனை பல்கலைக்கழகத்தில் வெளிவாரிப் படிப்பை மேற்கொண்டு கலைமாணிப் பட்டம் பெற்றவர்.
இவர் 1990-இல் புலம்பெயர்ந்து நோர்வே நாட்டுக்கு சென்றவர்.
தினகரன் பத்திரிகையில் இவரது படகுத்துறை அருகினிலே – 1975, லாவண்யா ஒரு முற்றுப்புள்ளி – 1976, இளமைக் கோவில் ஒன்று – 1977 ஆகிய நாவல்களை எழுதினார்.
சிந்தாமணி, வீரகேசரி, லண்டன் – மேகம், நோர்வே – பறை, பாரிஸ் – ஈழநாடு, ஈழமுரசு ஆகிய பத்திரிகைகளில் இவரது சிறுகதைகள் பிரசுரமாகியுள்ளன.
இவரது கலை இலக்கிய ஒலிபரப்பு, இசை வாழ்கையின் ஐம்பது ஆண்டுகள் நிறைவை பொன்விழாவாக மட்டக்களப்பு தமிழ்ச்சங்கம் ஒரு பொன்விழா மலரை 2023 ம் ஆண்டு ஜுன் மாதம் வெளியிட்டு கொண்டாடியது.
கதைகள்
ஆசிரியரின் பிற நூல்கள்
- இளமைக்கோவில் ஒன்று – நாவல்
- மலைக்கோட்டை மர்மம் – தொடர்கதை (சிறுவர்)
- படகுத்துறை அருகினிலே – நாவல்
- லாவண்யா ஒரு முற்றுப்புள்ளி – நாவல்
- புதுக்கோலங்கள் -(மெல்லிசைப்பாடல்கள்)
- மண்வாசம் – கவிதைகள்
- விடியாத இரவுகள் – சிறுகதைகள் (லில்லி தேவசிகாமணி இலக்கிய விருது (1997) தமிழ் நாடு)
- கோவிலூரின் பக்திப்பாடல்கள் தொகுப்பு
- தேசத்தின் தென்றல் (தாயக உணர்வுப் பாடல்கள்)
- இல்லாமல் போன இன்பங்கள் (கட்டுரைகள்)
- ஊருக்கு திரும்பணும் (சிறுகதைகள்)
விருதுகள்
- மென்னிசைக் கவிஞர் ஜெர்மனி தமிழ் மன்றம்- 1994
- புலம்பெயர்ந்தோருக்கான தந்தை செல்வா விருது 1996
- விடியாத இரவுகள் – லில்லி தேவசிகாமணி இலக்கியப் பரிசு, பணமுடிப்பும் – 1997
- வெள்ளிவிழா கலைஞர் விருது நோர்வே தமிழர் இணைவுகூடம் 1999
- முத்தமிழ் வாருதி அரியநாயகம் விருது.திருக்கோவில் 2000
- முத்தமிழ் காவலர் தமிழினி விருது இலண்டன். 2008
- கவிதைக் காவியர்,இலண்டன் ஸ்கைடோன் கிறிஸ்தவ இணையம் 2012
- திருவூர்க் கவிராயர்,விருது கனடா கிழக்கிலங்கை தமிழர் அமைப்பு.2013
- பல்துறைக் கலைஞர் .கனடா உதயன் சிறப்பு சர்வதேச விருது. 2017
- வாழ்நாள் சாதனையாளர் விருது அவுஸ்த்ரேலியா அக்கினிக்குஞ்சு 2019
- சிறப்பு வாழ்நாள் சாதனையாளர் விருது. தமிழ்நாடு கிராமியக் கலைகள் வளர்ச்சி அறக்கட்டளை.2022
என்னுரை – கொத்து ரொட்டி (சிறுகதைத் தொகுப்பு) – ஆடி 2018
எனது மூன்றாவது சிறுகதை தொகுப்பு வெளிவருவதில் மகிழ்ச்சி அடைகின்றேன். ஒரு கதைசொல்லியின் கற்பனை வடிவம்,அல்லது புனைவுகளின் போக்கு அந்த கதை சொல்லியின் எண்ணக் கருத்துகளுக்கு தக்கபடி இருக்கும் என்பதுதான் நிதர்சனம் என்று நினைக்கின்றேன். என் கதை சொல்லும் பாங்கும், எனது எழுத்து நடையும் வாசகர் மத்தியில் ஓரளவு வரவேற்பை பெற்றிருக்க வேண்டும்.அதனால்தான் எனது முந்தைய இரண்டு சிறுகதை தொகுப்புகளும் வெற்றி பெற்றன என்று நினைகின்றேன்.
முதலாவது சிறுகதை தொகுப்பான “விடியாத இரவுகள்” தொகுப்பே தமிழ்நாடு லில்லி தேவசிகாமணி இலக்கிய விருதைப் பெற்றது. இந்த விருது கிடைத்த முதல் ஈழத்து எழுத்தாளர் என்ற பெருமையை அந்த நூல் எனக்கு பெற்றுத் தந்தது.இரண்டாவது தொகுப்பான “ஊருக்கு திரும்பணும்” தொகுப்பு தாயகத்திலும், ஐரோப்பிய நாடுகளிலும், கனடாவிலும் அறிமுகம் செய்யப்பட்டது. ஒவ்வொரு நாடுகளிலும் இந்த நூல்பற்றிய திறனாய்வு. கதைசொல்லியான எனக்கு காத்திரமான செய்திகளை, தரவுகளை தந்தது.
பேராசிரியர் செ.யோகராசா அவர்களின் கண்ணோட்டத்தில், அவர் கருத்தியலின்படி “கோவிலூரின் சிறுகதைகள் ஈழத்து சிறுகதைத் தளத்திலிருந்து மாறுபட்டு நிற்பதோடு இதுவரை யாரும் தொடாத பேசப் பொருள்களை துணிச்சலுடன் கையாண்டு ஈழத்து சிறுகதையின் போக்கை அகலப்படுத்தி வேறு ஒரு தளத்திற்கு கொண்டு செல்கின்றன.
அது பாராட்டப்பட வேண்டியதே” என்று குறிப்பிடுகின்றார். அதேபோல் இலங்கையின் பிரபல்யமான திறனாய்வாளர் மரியாதைக்குரிய திரு.கே.எஸ்.சிவகுமாரன் அவர்கள் என் சிறுகதைகள் பற்றி தினக்குரல் நாளிதழுக்கு எழுதும்போது சொல்கிறார். “கிழகிலங்கையின் சிறுகதைப் போக்கு வித்தியாசமானது. வெறுமனே புனைவுகளுக்குள் நிற்காமல் சமூகம் சார்ந்த சிறுகதைகள் அங்கு முக்கியம் பெறுகின்றன. கோவிலூரின் கதைகள் அதற்கு சான்று பகிர்கின்றன.” என்கிறார். இப்படியான திறனாய்வுக் கருத்துகள் ஒரு எழுத்தாளனுக்கு வலுச்சேர்க்கும் அடுத்த படைப்புகளுக்கு நல்ல முறையில் கதிகாலிடும் என்பதில் ஐயமில்லை..
என் மண்சார்ந்த,பிரச்சினைகள், கிழக்குமாகாணத்தில் உள்ள அவலங்கள். சமூகங்களுக்குள் உள்ள ஏற்றத்தாழ்வுகள். வறுமைக் கோட்டுக்கு கீழே உள்ள மக்களின் வாழ்வியல் பிரச்சினைகள், அரசியல் வாதிகளின் அடாவடிகள், ஆக்கிரமிப்புகள், போன்ற விடயங்கள் என்னைப் பாதித்தும், ஆதங்கப்பட வைத்தும் இருக்கின்றன. அதேநேரம் புலம்பெயர் நாடுகளில் உள்ள எம்மவர்களின் தன்னார்வ தொண்டு அமைப்புகள். எங்கள் மாவட்ட மட்டத்தில் மேற்கொள்ளும் ஆக்க பூர்வமான செயல்பாடுகள் என்னை மகிழ்ச்சிப்பட வைத்தும் உள்ளன.இந்த நூலில் மேற்குறிப்பிட்ட விடயங்களை கதைகளாக தந்துள்ளேன். இடையிடையே சற்று மாறுதலுக்காக சுவாரஸ்யமான கதைகளும் எழுதியுள்ளேன்.
இம்முறை இந்த நூல் பற்றி இலண்டனிலுள்ள எம் மண்ணின் மைந்தன் அன்புக்குரிய தம்பி,திரு சாம்.வேணுகோபால் அவர்களிடம் கூறியபோது அவர் மிகவும் மகிழ்ந்து தாமாக முன்வந்து இந்த நூலை பதிப்பித்து வெளிக்கொண்டுவர விரும்பினார். அதற்கு தக்கபடி அவருடன் சேர்ந்து அனுசரணை வழங்க இலண்டனில் உள்ள மருத்துவக் கலாநிதிகள். திரு.A. ராஜகோபால். திருமதி காந்தா நிரஞ்சன் ஆகிய இருவரையும் கேட்டுகொண்டார்.அவர்களும் விருப்புடன் அனுசரணை வழங்கி உள்ளார்கள். இவர்களுக்கு என் நெஞ்சார்ந்த நன்றி. மற்றும் நான் எப்போது எது கேட்டாலும் எந்தவித எதிர்பார்ப்பும் இல்லாமல் மனமுவந்து உதவி செய்துதரும் என் அன்புக்குரிய தம்பி திரு. மதன் சதாசிவம் அவர்களும் இந்த நூலை வடிவமைத்துத்தந்த திரு. த. சங்கர் அவர்களுக்கும் இந் நூலின் அட்டைப்படத்தை மிக அழகாகவும். நேர்த்தியாகவும் அமைத்துத்தந்த ஓவியர் திரு. கௌசிக் அவர்களுக்கும் என் நன்றி.
இனி அணிந்துரை வழங்கி இருக்கும் என் பாசத்திற்கும். மரியாதைக்குமுரிய முன்னாள் கல்வி அமைச்சின் மேலதிக செயலாளரும், அரச அதிபராக இருந்தவரும், சிறந்த கல்வியாளரும், எழுத்தாளரும். எல்லாவற்றிக்கும் மேலாக ஒரு பன்முக கலைஞருமான திரு உடுவை எஸ். தில்லைநடராஜா அவர்களுக்கும். நான் கேட்டவுடன் மறுக்காமல் வாழ்த்துரை வழங்கியுள்ள கிழக்குப் பல்கலைக்கழக தமிழ்த்துறைத் சிரேஸ்ட விரிவுரையாளர் திருமதி றூபி வலண்டினா பிரான்சிஸ் அவர்களுக்கும் என் நன்றி மற்றும் அட்டைப்பட ஓவியர், அன்புத்தம்பி கலைஞர் A.O. அனல் அற்புதமாக அச்சுவாகனம் ஏற்றிய பதிப்பகத்தார் ஆகியோருக்கும் என் மனமார்ந்த நன்றி.
அன்பார்ந்த வாசகப் பெருமக்களே! இந்த நூலில் உள்ள பல சிறுகதைகள் வெறுமனே புனைவுகள் அல்ல. எமது பிரதேச மக்களின் அவலங்களை இவை சொல்கின்றன. இவற்றை வாசித்து நீங்கள் கொடுக்கும் பின்னூட்டம், மற்றும் ஆதரவு என்னை அடுத்த முயற்சிக்கு இட்டுச்செல்லும். என்று கூறி விடை பெறுகின்றேன்.
அன்புடன்
கோவிலூர் செல்வராஜன்
(இலண்டன் / ஒஸ்லோ)