தேநீர் நேரம்

கதை மாந்தர்

ஓய்வு பெற்ற பேராசிரியர் முத்துக்குமரன்

அவரது மனைவியார் கமலச் செல்வி

வெவ்வேறு காலங்களில் அவரிடம் படித்த அவரது முன்னாள் மாணவர்கள் –

ராஜவேலன் , தீபக் , சாந்தி , பொன்னழகி , ராஜேஸ்வரி

(திரை எழுகிறது. விளக்குகள் ஒளிர்கின்றன. நடுத்தரக் குடும்பத்து வீட்டு கூடம் போன்ற பின்னணி.

இரண்டு சோபாக்களும் நான்கைந்து நாற்காலிகளும் உள்ளன. ஒற்றை சோபா ஒன்றில் முத்துக்குமரன் அமர்ந்து இருக்கிறார். அவரது முன்னாள் மாணவமணிகள் ராஜவேலனும் தீபக்கும் சாந்தியும் ராஜேஸ்வரியும் மலர்ந்த முகத்துடன் வணக்கம் கூறியவாறு வந்து நாற்காலிகளில், சோபாக்களில் அமர்கின்றனர். )

முத்துக்குமரன் : இன்னிக்கு தேநீர் நேரம் நிகழ்ச்சிக்கு எல்லாரும் வந்துட்டிங்க . உங்களுக்கு இருக்கிற பல்வேறு அலுவல்களுக்கு நடுவுல , இங்கு இந்த மாலை நேரத்துல வந்ததற்கு நன்றி . பேச்சை செவி மடுத்து பருகுவதற்கு முன்பாக தேநீர் பருகுங்கள். கமலம் தேநீர் தயாரா ? பிள்ளைகளுக்கு பருக கொடு.

கமலா : இன்னும் பொன்னழகி வரவில்லையே .. போக்குவரத்து நெரிசலில் மாட்டிக் கொண்டு விட்டாளோ என்னவோ ..

தீபக் : மேம் பொன்னழகி என்கிற பெண் அழகி வந்த பின்னே நாம் தேநீர் அருந்தலாம் . சார் இன்னிக்கு என்ன டாபிக் பேசப் போறீங்க ன்னு ஆர்வமா இருக்கு

முத்துக்குமரன் : இன்றைய கால கட்டத்தில் எல்லாமே உங்கள் கைபேசியிலிருந்து கிடைக்கும் போது , நான் சொல்வதைக் கேட்க மாதம் தோறும் இந்த தேநீர் நேரம் நிகழ்ச்சிக்கு நான் பேசுவதைக் கேட்க நீங்கள் எல்லாம் வருவது எனக்கு மகிழ்ச்சி அளிக்கிறது . இங்கிலீஷ்ல சொல்லணும்னா ஐ ஆம் ஓவர்வெல்ம்டு …

கமலா : இப்ப எதுக்கு உணர்ச்சி வசப்படறீங்க .. பார்க்க சகிக்கல .. இதோ பொன்னழகி வந்து விட்டாள் ..

(பொன்னழகி வருதல் )

பொன்னழகி : வணக்கம் சார் வணக்கம் மேம் வணக்கம் நண்பர்களே …

(சாந்தி அனைவருக்கும் தேநீர் பரிமாறுகிறாள். )

முத்துக்குமரன் : இன்னிக்கு நான் மக்கள் தொடர்பு என்பது குறித்து தான் ஒங்க கிட்ட பேசப் போறேன்.

பொன்னழகி : சார் இனிமேல் உங்க பேச்சை நான் என்னோட யூட்யூப்ல போடப் போறேன் . இருங்க … நான் ஆயத்தமா ஆயிடறேன்.

தீபக் : அடுத்த முறை நம்ம ஆபீஸ் மீட்டிங் மாதிரி கூகுள் மீட் , ஜூம் மீட் ல சாரை பேசி வைச்சு லைவ்வா அப்லோடு பண்ணிடலாம் .

பொன்னழகி : ஆமாம் . சாரோட பேச்சுகளை டிஜிட்டல் பரப்புல கொண்டு சேர்த்தாகணும் .

முத்துக்குமரன் : தேங்க்ஸ் நன்றி .. உங்களுக்கு எல்லாம் உத்யோக வாழ்க்கையில் நீங்கள் அறிந்த விஷயமாக கூட இருக்கலாம். இருந்தாலும் , இன்று நான் பேச உள்ள தலைப்பு

மக்கள்தொடர்பின் மகத்துவம் –

மக்கள் தொடர்பு என்கிற சொல்லாட்சி Public Relations என்ற ஆங்கில சொல்லுக்கு இணையான சொல்லாக புழக்கத்தில் இருந்து வருகிறது. அப்படியே பொருள் கொள்வது சரியே ஆனாலும் முழுமையான பொருள் ஆகாது. நீங்கள் சமுதாயத்தில் ,வர்த்தகத்தில் , தொழில் இடத்தில் அன்றாடம் எதிர்கொள்ளும் நபர்களுடன் பழகும் விதம் ,அணுகுமுறை ஆகியவையே மக்கள் தொடர்பு என்னும் PR பண்பு ஆகும். மிகப் பெரிய மனிதர்களில் சிலர் , லிப்ட் இயக்குபவர் , சாதாரண ஊழியர்கள் ஆகியோருக்கு நன்றி சொல்வார்கள். இது காரியம் சாதித்துக் கொள்ளும் உத்திகளில் ஒன்றாக நமக்குத் தோன்றலாம். காரியம் ஆக வேண்டிய நேரத்தில் ஒரு விதமாகவும் மற்ற சமயங்களில் அலட்சியமாகவும் சிலருடைய போக்கு இருக்கும். அது PR பண்பு ஆகாது. நீங்கள் எந்த மனநிலையில் , சிக்கலில் இருந்தாலும் கூட மலர்ந்த முகத்துடன் எதிர் வருபவரை எதிர்கொண்டால் அதுதான் PR பண்பு. புதிய இடங்களில் கூட , மொழி புரியாதவர்கள் இடையே சிலர் தங்களுக்குத் தேவையான தகவல் பெறுவதற்கு , வழிமுறை அறிந்து கொள்ள இந்த PR பண்பு உறுதுணை புரிகிறது.

உங்களுக்குள் உள்ள கூச்சத்தை உடைத்துக் கொண்டால் இந்த பண்பை நாம் வளர்த்துக் கொள்ள முடியும். அதற்காக , Loose talk என்கிற வகையில் தொடர்பில்லாத , எதிராளி சங்கோஜப்படுகிற வகையில் பேச்சைத் தொடங்குவதற்கோ வளர்ப்பதற்கோ பேசி விடக் கூடாது.

இன்றைய கால கட்டத்தில் , ஒருவருடைய தனிப்பட்ட விஷயங்களைப் பற்றி கேள்விகளைக் கேட்டுத் துளைப்பது அநாகரிகம் . வாழ்க்கை எல்லோருக்கும் ஒரே மாதிரியாக அமைந்து விடுவதில்லை . சாதி , இன , மத வேறுபாடுகளைக் கடந்து உங்களுக்கு கான்டாக்ட் என்னும் சொத்து கிடைக்க PR பண்பு நலன் மிகவும் இன்றியமையாதது. அடுத்தவருக்கு ஆயிரம் பணி இருக்கும் என்பதைக் கருத்தில் கொண்டு நேரத்தின் அருமை உணர்ந்து பேசுவதுதான் உங்களுக்கும் நல்லது அவர்களுக்கும் நல்லது. நீங்கள் PR person என்பதை உங்கள் நேர நிர்வாக குணம் சுட்டிக்காட்டும். இதனை அந்தக் காலத்தில் திருவள்ளுவர் , சொலல் வலன் சோர்விலன் என்று நமக்குச் சொல்லிக் கொடுத்தார். நமது முன்னோர் கூறிய இங்கிதம் என்கிற சொல்லாட்சியும் PR பண்பின் ஒரு கூறு எனலாம்.

PR பண்பு வெளிப்படும் சூழல்கள் பற்றிப் பார்ப்போம் –

ஆங்கிலத்தில் over the phone , in writing , across the table என்று முன்பெல்லாம் குறிப்பிடுவார்கள். இன்று முற்றிலும் மாறிப் போன டிஜிட்டல் யுகம். சமூக ஊடகங்கள் , செயலிகள் , மின் அஞ்சல் வாயிலாக தகவல்களை அனுப்பும் போது தெளிவுடனும் இரத்தினச் சுருக்கமாகவும் செய்தி பகிர்ந்து கொள்ளும் முறையில் உங்கள் PR பண்பைக் கைக்கொள்ள வேண்டியது அவசியமாகும். PR அணுகுமுறைகளைப் பொறுத்தே உங்கள் கான்டாக்ட்ஸ் அமையும். அதுவே உங்கள் சுயதொழில் , வர்த்தகம் மற்றும் உத்யோக வாழ்வில் நீங்கள் வெற்றிகளை நோக்கி பயணிக்க உதவும் .

மக்கள் தொடர்புத் துறை என்றால் என்ன? பெரும் கார்ப்பரேட் நிறுவனங்களிலும் பொதுத்துறை நிறுவனங்களிலும் மக்கள் தொடர்பு இயக்குநர் , மக்கள் தொடர்பு அதிகாரி என்றெல்லாம் இருப்பார்கள். தனியாக மக்கள் தொடர்புத் துறையும் இருக்கும் .

ஊடகங்கள், விளம்பர ஏஜென்சிகளுடன் தொடர்பு கொள்வது உள்ளிட்ட பல்வேறு பணிகள் இவர்களது பொறுப்பு. தங்கள் நிறுவனம் பற்றிய தவறான தகவல் , எதிரான தகவல் வந்தால் அது குறித்த மறுப்புரைகளை வெளியிடச் செய்வதும் இவர்கள் பொறுப்பு .

PR ஏஜென்சிகள் – விளம்பரங்கள் மூலம் வாடிக்கையாளர்களுக்குத் தங்கள் தயாரிப்பு மற்றும் சேவையை கொண்டு செல்ல வர்த்தகர்கள் , தொழிலதிபர்கள் பயன்படுத்தி வந்த நிலையில் தொண்ணூறுகளில் PR ஏஜென்சிகள் தோன்றின. இவை , ஊடகங்களில் , செய்திகள் வடிவில் தயாரிப்புகள் பற்றிய விவரங்களைக் கொண்டு சென்றன. ஊடகங்களின் பிரதிநிதிகளைச் சந்திக்கும் சந்திப்பு நிகழ்ச்சிகளை நடத்தித்

தருபவர்களாகவும் இவர்கள் இருந்த நிலையில் Event Management க்கு என்று தனியாக ஏஜென்சிகள் , 2000 க்குப் பிறகு தோன்றி வெற்றிக்கொடி நாட்டின.

ஊடகங்கள் என்பவை மனிதனின் கைக்குள்ளேயே அடங்கி விட்ட இன்றைய காலகட்டத்தில் டிஜிட்டல் PR ஏஜென்சிகள் என்பவை தோன்றி செயல்பட்டு வருகின்றன.

இங்கிதம் பழகு என்று நம் முன்னோர் சொன்னது தனித் துறையாக திகழ்கிறது. அன்றாட வாழ்வில் நாம் கடைப்பிடிக்க வேண்டிய முக்கிய பண்பாகவும் PR பண்பு . இத்துடன் என் சிற்றுரையை முடிக்கிறேன். நன்றி .

ராஜவேலன் : நன்றாக இருந்தது சார். பயனுள்ள நேரம் இந்த தேநீர் நேரம் என்னைப் போல் , சுயதொழில் செய்பவர்களுக்கும் பிஆர் பண்பு அவசியம் என்பதை சொன்னீங்க சார் நன்றி

சாந்தி : செவிக்கு உணவு இல்லாத போது சிறிது வயிற்றுக்கு … இப்பொழுது நான் என் வீட்டில் அடியாள் தயாரித்து எடுத்து வந்த தின்பண்டங்களை தருகிறேன்.

தீபக் : அய்யிய்யோ … நான் விடைபெறுகிறேன்.

சாந்தி : இப்படி சொன்னால் யார் தான் என் தயாரிப்பை சாப்பிட முன் வருவார்கள் .. ?

முத்துக்குமரன் : சாந்தி , நானும் என் மனைவியும் சாப்பிடுவோம் .. கண்டிப்பாக .. என் உரையின் தொடர்ச்சியாக , விடுபட்ட ஒரு விஷயத்தைக் கூறுகிறேன்…

நீங்கள் உங்கள் கிளையன்ட் இடத்திற்குச் சென்றிருக்கும் போது அங்கு ஏதாவது இடர்ப்பாடோ விபத்தோ பேரிடரோ நேரிட்டால் நீங்கள் உடனே அங்கிருந்து நகர்ந்து விடாமல் அவர்களுடன் தோள் கொடுத்து உதவி புரிய வேண்டும்.

தீபக் : ராஜவேலன் , துண்டைக் காணோம் துணியக் காணோம் என்று ஓடி வந்து விடுவார்.

ராஜவேலன் : டேய் நான் சபையில உன்னை பத்தி சொல்லி விடுவேன்…

முத்துக்குமரன் : சரி ராஜு .. விடு .. இந்த மாலைப் பொழுதில் ஒரு அறிவிப்பு …. நான் பொன்னழகியை …

கமலா : என்னது ??

முத்துக்குமரன் : வரேன் ஏன் அவசரம் … வேலை வேலை என்று ஆன வயது தெரியாமல் ஓடிக் கொண்டிருக்கும் பொன்னழகிக்கும் ராஜவேலனுக்கும் திருமணத்தை விரைவில் நான் முன் நின்று நடத்த உள்ளேன்.

(அனைவரும் கரவொலி எழுப்புகின்றனர். )

தீபக் : பொன்னழகி கிட்ட ராஜவேலன் மாட்டப்போறாரு. பேசா மடந்தை ராஜி கிட்டயும் .. சாந்தி கிட்டயும் யார் யார் மாட்டித் தவிக்கப் போறாங்கன்னு தான் தெரியல..

(சாந்தி , முத்துக்குமரனின் ஸ்டிக்கை கையில் எடுத்துக் கொண்டு அடிக்க வருகிறாள் . தீபக் வீட்டு வாசலை நோக்கி ஓடுகிறான். )

(திரை )