மறக்கப்பட்ட போட்டிக்கு AI கொடுத்த உயிர்

“கேமரா, மைக், லைட்டிங் எதுவும் இன்றி AI மென்பொருளை மட்டுமே பயன்படுத்தி புதுமையான வீடியோக்களை உருவாக்குவதற்காக கூகுள் மில்லியன் டாலர் பரிசு ஒன்றை அறிவித்திருக்கிறது,” அறிவிப்பை படித்துக்கொண்டே சொன்னான் ராஜ். “அதிகபட்சம் இருபத்தைந்து நிமிடங்கள். கலை, அறிவியல், வரலாறு, விளையாட்டு என பல முக்கிய பிரிவுகளில்.”

பிரியா முணுமுணுத்தாள். “சரி தான். யாரும் பார்க்க விரும்பாத ஒரு நிமிட AI குப்பையை உற்பத்தி செய்யும் இன்னொரு 2029 போட்டி.”

“அப்போ, யாருமே எதிர்பார்க்காத, எல்லோரும் அசந்து போய் பார்க்கிற மாதிரி ஒரு வீடியோவை உருவாக்குவோம்.”

“என்ன மாதிரி?”

ராஜ் புன்னகைத்தான். “இந்தியா ஜிம்பாப்வே இடையில் நடந்த 1983 கிரிக்கெட் உலகக் கோப்பை போட்டி. ஜூன் பதினெட்டு.”

“சாத்தியமே இல்லாத வெற்றியை இந்தியா அடைந்த அந்த போட்டியா?” பிரியா நிமிர்ந்து உட்கார்ந்தாள். “அந்த போட்டியை யாருமே வீடியோவில் பதிவு செய்யவில்லை, இல்லையா?”

“ஆமாம். அன்று பிபிசி கேமரா குழுவினர் வேலைநிறுத்தத்தில் இருந்தனர். இன்று மாதிரி அன்று செல் போன்கள் புழக்கத்தில் இல்லை. கிரிக்கெட்டின் வரலாற்றையே புரட்டி போட்ட போட்டி எந்த கேமராவினாலும் பதிவு செய்யப்படவில்லை. நேரில் வந்து பார்த்த சில ஆயிரம் ரசிகர்களின் நினைவில் மட்டுமே அது இன்றும் இருக்கிறது.”

“அதை நாம் AI மூலம் துல்லியமாக மறு உருவாக்கம் செய்யலாம்,” என்றாள் பிரியா உற்சாகத்துடன். “முழு இருபத்தைந்து நிமிடங்களும், போட்டியின் சிறந்த தருணங்களைப் பிடித்து. ஒவ்வொரு ஃபிரேமாக.”

அடுத்த மூன்று மாதங்கள் அவர்கள் வெறியுடன் உழைத்தார்கள். விஷுவல்களை பிரியா கவனித்துக் கொண்டாள், ராஜ் ஆடியோவில் கவனம் செலுத்தினான். அந்த போட்டி பற்றிய ஒவ்வொரு கட்டுரையையும் — செய்தித்தாள் அறிக்கைகள், ஸ்கோர்கார்டுகள்,

விளையாட்டு வீரர்களின் பேட்டிகள் — அவர்கள் நுணுக்கமாகப் படித்தனர். விக்கெட்டுகள், சிக்ஸர்கள், போட்டியின் திருப்புமுனைகள் என முக்கியமான தருணங்களை அடையாளம் கண்டனர். இரண்டு அணியின் விளையாட்டு வீரர்களின் சிறந்த புகைப்படங்களையும் மிகுந்த சிரத்தையுடன் சேகரித்தனர்.

“கபில் அடித்த, ஒரு வீட்டின் கூரையில் விழுந்த அந்த பிரமாண்டமான சிக்ஸரை நான் உருவாக்கிக் கொண்டிருக்கிறேன்,” பிரியா கம்ப்யூட்டர் திரையை உற்று நோக்கியபடி சொன்னாள். “4K தெளிவுத்திறன். ஒவ்வொரு தசை அசைவும்.”

“எண்பதுகளில் நடந்த போட்டிகளின் மைதான சத்தத்தை துல்லியமாக பிரதி எடுத்துவிட்டேன்,” ஒலி அடுக்குகளை சரி செய்தபடி சொன்னான் ராஜ். “இங்கிலாந்து பிட்சுகளில் பந்தும் மட்டையும் மோதும் சத்தம் வித்தியாசமாக இருக்கும். அந்த காலத்திய கமென்டரி பாணியையும் சேர்க்கிறேன்.”

“நாற்பத்தி இரண்டாவது ஓவரில் மைதானத்தில் விழும் நிழலின் கோணங்கள் சரியாக இல்லை,” அதிகாலை மூன்று மணிக்கு பிரியா தூங்கி விழுந்த படியே முணுமுணுத்தாள்.

“அந்த முக்கியமான கேட்ச் பிடித்தபோது ரவி சாஸ்திரி தர்ட் மேனில் நிற்கவில்லை,” பிரியாவின் ஒவ்வொரு ஃபிரேமையும் QA செய்து கொண்டிருந்த ராஜ் சொன்னான்.

கபிலுக்கு சிறந்த வீரர் விருது கிடைத்தபோது அவரது முகத்தில் இருந்த சரியான பாவனையை உருவாக்க பிரியாவிற்கு மூன்று மணி நேரம் பிடித்தது.

போட்டி நாள் வந்தது. அவர்கள் சமர்ப்பித்துவிட்டு காத்திருந்தனர். கூகுள் வெற்றியாளர்களை அறிவித்தது — கலைப் பிரிவில் குவாண்டம் இயற்பியலை காட்சிப்படுத்தல் பற்றிய வீடியோ வென்றது. அறிவியல் பிரிவில் செவ்வாய் கிரக காலனி வீடியோ வென்றது.

விளையாட்டு? அமெரிக்க கால் பந்து எதிர் காலத்தில் எப்படி வளர்ச்சியடையும் என்ற ஊகக் கணிப்பு பரிசை வென்றது.

“எல்லோரும் செய்தது போல் மிருகங்கள் நடனமாடும் வீடியோவை செய்திருக்கலாம்,” ராஜ் ஏமாற்றத்துடன் பெருமூச்சு விட்டான்.

அப்போது பிரியாவின் தொலைபேசி அலறியது. பிபிசியிலிருந்து அழைப்பு.

பிபிசி தயாரிப்பாளரின் குரல் அறை முழுவதும் நிரம்பியது: “அசல் ஸ்கோர்கார்டு மற்றும் வானொலி வர்ணனையைக் கொண்டு உங்கள் வீடியோவை நாங்கள் சரி பார்த்தோம். ஒவ்வொரு பந்தின் பாதையும், ஒவ்வொரு வீரரின் நிலையும், ரசிகர்களின் கூச்சலும், பல கோணங்களில் மைதானமும் — அனைத்தும் துல்லியமாகவும் அற்புதமாகவும் வடிவமைக்கப்பட்டுள்ளன. இது ஒரு நம்ப முடியாத, பிரமாண்டமான AI வேலை. வாழ்த்துக்கள், நண்பர்களே.”

“கபில் உங்கள் வீடியோவை பார்த்தார்,” தயாரிப்பாளர் தொடர்ந்தார். “இருபத்து மூன்றாவது ஓவரில் பின்னியின் முகத்தில் தோன்றும் பதற்றத்தை நீங்கள் மிக அழகாக சிறைப் பிடித்திருக்கிறீர்கள் என்றும், அது நாற்பத்தி ஆறு வருடங்களாக தான் மறந்திருந்த ஒன்று என்றும் அவர் சொன்னார்.”

கடைசியாக தயாரிப்பாளர் ஒன்றை அறிவித்தார், “உங்கள் வீடியோவை நாங்கள் ஒளிபரப்ப விரும்புகிறோம். பிரைம் டைம் நேரத்தில். ஒப்பந்தத்தை உங்களுக்கு அனுப்புகிறேன்.”

அழைப்பை துண்டித்தபின், பிரியா யோசித்த படியே சொன்னாள். “நாம் கூகுள் அறிவித்த மில்லியன் டாலரை வெல்லவில்லை.”

ராஜ் புன்னகைத்தான், “ஆனால் நாம் பில்லியன் மக்களின் இதயங்களை வெல்லப் போறோம்.”

“அவர்கள் ஒருபோதும் பார்க்க முடியாது என்று நினைத்த ஒன்றை அவங்களுக்குக் கொடுத்ததற்காக,” பிரியா மென்மையாக சேர்த்தாள்.

வெளியே, மும்பையின் பருவமழை தொடங்கியது. உள்ளே, இரண்டு படைப்பாளிகள் ஆழமான ஒரு உண்மையை நிரூபித்திருந்தனர்: சிறந்த AI படைப்பு சாத்தியமற்றதை உண்மையாக்குவதில்லை – அது மறக்கப்பட்டதை மறக்க முடியாததாக்குகிறது.