நடுநிசியில் பிறந்தார் இயேசு பாலன்

(கிறிஸ்துமஸ் கவிதை)

கரும் இருளில் குளிர்ந்த குடிலில்
கடவுள் வந்து பிறந்தார் மனிதனாக
கயமைகளைப் பிடுங்கி களைந்திடவே
கனவான் வந்தார் வானிலிருந்து பூமிக்கே….

கனவுலகில் வாழும் மனிதரை
கண்டபடி வாழும் கால்நடை மாந்தரை
கரையேற்றி நல் வழிப் படுத்திட
கட்டு மரமேறி நற்செய்தி பரப்பிய தேவனவர்…

எங்கும் எதிலும் பாவங்களாய்
எழுதிச் செல்லும் மைந்தர்களை
எழுந்திடச் செய்யவே – உலகிற்கு
வந்தார் சிலுவைச் சுமந்திட சின்ன குமாரன்…

வண்ண நிலவைச் சுமக்கும்
வானிலிருந்து பூமிக்கு வந்தார்
வானகத் தேவன் குழந்தை இயேசு பாலனாக
வருந்தும் மாந்தரின் பாவங்களைக் கழுவிட…

குழந்தையாய் வந்தார் குழிவிழுந்த
குமிழ் விடும் சிரிப்போடே அன்னை மரியிடமிருந்து
கும்பிட்டுத் தொழுவோம் பாலன் இயேசுவை.