ஏன் சிரித்தது மீன்?

 

மீன் விற்கும் பெண் அரண்மனைப் பக்கமாகப் போனாள். ஜன்னலில் இருந்து எட்டிப் பார்த்த ராணி அவளை அழைத்தாள். அப்போது கூடையில் இருந்து ஒரு பெரிய மீன் வெளியே விழுந்து துள்ளியது. ‘‘இது ஆண் மீனா, பெண் மீனா? எனக்கு பெண் மீன்தான் பிடிக்கும் என்றாள் ராணி. உடனே மீன் ‘ஹாஹாஹா’ என்று சிரித்தது. ‘‘இது ஆண் மீன்’’ என்றாள் மீன்காரி.

ராஜா அந்தப்புரத்துக்கு வந்தபோது ராணி மிகவும் கோபமாக இருந்தாள். ‘‘மீன் சிரித்த கதையைச் சொன்னாள். ‘‘எவ்வளவு கிண்டலாகச் சிரித்தது தெரியுமா?’’ என்றாள்.

உடனே மந்திரியிடம் விஷயத்தைச் சொன்ன ராஜா ‘‘மீன் சிரித்த காரணத்தை ஆறு மாதத்துக்குள் கண்டுபிடிக்கவில்லை என்றால் உங்களுக்கு மரண தண்டனை’’ என்றார்.

அமைச்சர் அறிஞர்களையும் கல்விமான்களையும் மந்திரவாதிகளையும் சந்தித்தார். யாராலும் மீன் சிரித்ததன் காரணத்தைச் சொல்ல முடியவில்லை. ஐந்து மாதங்கள் ஓடிவிட்டன.

அமைச்சரின் மகன் ‘‘நானும் இதுக்கு விடை கண்டுபிடிக்கப் பார்க்கிறேன்’’ என்று சொல்லிவிட்டு கால் போன போக்கில் அலைந்தான். வெகுதூரம் போய்விட்டான். வயதான விவசாயி ஒருவர் போய்க்கொண்டிருந்தார். ‘‘நான் உங்களோடு சேர்ந்து வரலாமா?’’ என்றான். அவரும் சம்மதித்தார்.

‘‘நாம் ஒருவரை ஒருவர் மாற்றி மாற்றி தூக்கிக்கொண்டு போகலாமா?’’ என்று கேட்டான். பையன் முட்டாள் போலிருக்கிறது என்று நினைத்துக்கொண்டார் விவசாயி.

சற்று நேரம் கழித்து ஒரு அறுவடைக்குத் தயாராக இருந்த கோதுமை வயல் ஒன்று வந்தது. தங்கக் கடல் போல் கதிர்கள் அசைந்தன. ‘‘இது தின்ற கோதுமையா, தின்னாத கோதுமையா?’’ என்று கேட்டான். பையன் படு முட்டாள் என்று நினைத்துக்கொண்டார் விவசாயி.

ஒரு காட்டுப் பகுதியில் நடந்துகொண்டி ருந்தார்கள் இப்போது. இளைஞன் ஒரு கத்தியை எடுத்து விவசாயி கையில் கொடுத்து ‘‘நமக்கு ஆளுக்கொரு குதிரை ஏற்பாடு பண்ணுங்க. கத்தி பத்திரம்’’ என்றான்.

இவன் சுத்த பைத்தியக்காரன்தான் போலிருக்கிறது. ஆனாலும் இவனைத் துரத்திவிட வேண்டாம் என்று நினைத்தார் விவசாயி. தொடர்ந்து நடந்தார்கள். ஒரு நகரம் வந்தது. அதைக் கடந்ததும் ‘‘ரொம்பப் பெரிய சுடுகாடு, இல்லையா?’’ என்றான். இவன் பேசுவது ஓரளவு பழகிவிட்ட விவசாயி ஒன்றும் சொல்லவில்லை. கொஞ்ச தூரம் போனதும் ஒரு சுடுகாட்டில் ஒரு பிணத்தைப் புதைத்த உறவினர்கள் இவர்களை அழைத்து சப்பாத்திகளும் காபியும் கொடுத்தார்கள். ‘‘ரொம்ப அழகான ஊர்..’’ என்று சுடுகாட்டைப் பார்த்துச் சொன்னான் இளைஞன். விவசாயி மறுபடி கடுப்பானார். ஆனாலும் ஆள் பார்க்க உயர்ந்த குடும்பத்தை சேர்ந்தவன் போல் இருப்பதால் அவனை தன் வீட்டுக்கு வரும்படி அழைத்தார். ‘‘பதிலுக்கு உங்கள் வீட்டு உத்தரம் உறுதியாக இருக்கிறதா?’’ என்று கேட்டான் இளைஞன்.

அவனை ஓர் அறையில் உட்காரவைத்துவிட்டு நடந்ததை எல்லாம் மகளிடம் சொன்னார் விவசாயி. ‘‘அட, அவர் பெரிய புத்திசாலியாக இருக்கிறாரே’’ என்று வியந்த மகள், எல்லாவற்றுக்கும் விளக்கம் சொல்லத் தொடங்கினாள்.

ஒருவரை ஒருவர் தூக்கிக்கொண்டு நடப்பது என்றால் மாறி மாறிக் கதை சொல்வது என்று அர்த்தம்.

கடன் வாங்கி விவசாயம் செய்திருந்தால் கடன் கொடுத்தவர் கோதுமையைக் கொண்டு போய் விடுவார். வேளாண்மை செய்தவருக்குப் பயன்படாது. அது ‘தின்ற கோதுமை’.

கத்தியைக் கொடுத்து குதிரை வாங்கச் சொன்னது, ஊன்றிக்கொண்டு நடக்க கம்பு வெட்டுவதைக் குறிக்கும்.

நகரத்தில் யாரும் இவர்களிடம் இன்முகம் காட்டாததால் அது இறந்த மனிதர்களின் கல்லறை. சுடுகாட்டில் இறந்தவர்களின் உறவினர்கள் இவர்களை உபசரித்ததால் அது அழகான ஊர்.

உத்தரம் உறுதியா? என்றால் அவனை வீட்டுக்கு அழைக்கும் அளவு வசதி இருக்கிறதா என்று பொருள். விளக்கங்களைக் கேட்டதும் விவசாயி ஆச்சர்யப்பட்டார். இளைஞனை அழைத்து வந்தார். எல்லாரும் உட்கார்ந்து சாப்பிட்டார்கள். ‘‘நான் பேசியதற்கெல்லாம் விளக்கம் கொடுத்த உங்கள் மகள் பெரிய புத்திசாலிதான்’’ என்று சொன்ன இளைஞன் அவளைப் பார்த்து மீன் சிரித்த பிரச்னையைச் சொன்னான்.

அதற்கு அவள் ‘‘ராணியின் அந்தப்புரத்துக்குள் யாரோ ஆண் இருக்க வேண்டும். அதனால்தான் அந்த மீன் கிண்டலாக சிரித்திருக்கிறது. இதைத் தவிர வேறு காரணம் இருக்க முடியாது’’ என்று சொன்னாள்.

இளைஞனும் ஒப்புக்கொண்டான்.

வேகமாக தன் ஊருக்குத் திரும்பி அப்பாவிடம் மீன் சிரித்த காரணத்தைச் சொன்னான்.

அவரும் அரண்மனைக்குச் சென்று ராஜாவிடம் சொன்னார்.

‘‘கிடையவே கிடையாது. அந்தப்புரத்தில் ஆண்கள் இருக்க மாட்டார்கள்’’ என்று மறுத்தார் ராஜா.

‘‘அதோ அந்தப் பள்ளத்தில் அந்தப்புரத்தில் இருக்கும் பெண்கள் எல்லாரையும் குதிக்கச் சொல்லுங்கள், உண்மை விளங்கிவிடும்’’ என்றார் மந்திரி

பல பெண்களும் பள்ளத்தைப் பார்த்ததும் ‘‘இதில் குதிக்க என்னால் முடியாது’’ என்றார்கள். ஒரு பெண் மட்டும் பள்ளத்தில் குதித்து மீண்டும் வெளியே வந்தாள். ‘‘அந்தப் பெண்ணைப் பிடித்து விசாரியுங்கள்’’ என்றார் மந்திரி. விசாரணையில் அவன் வேற்றுநாட்டு ஒற்றன். பெண் வேடம் போட்டுக்கொண்டு வந்திருக்கிறான் என்பது தெரியவந்தது. அந்தப்புரத்திலேயே ஓர் ஆணை வைத்துக்கொண்டு மீனில் பெண்தான் வேண்டும் என்று கேட்ட ராணியின் முட்டாள்தனத்தை நினைத்துத்தான் மீன் சிரித்தது!

- வெளியான தேதி: 16 அக்டோபர் 2006 

தொடர்புடைய சிறுகதைகள்
நாடோடிக் கதை வரிசை-24 : பஞ்சாப் ஒரு நரி ஆற்றுப் பக்கம் தண்ணீர் குடிக்கப் போனது. எதிர்க்கரையில் இருந்த ப்ளம் மரங்களில் நிறைய பழங்கள் பழுத்துக் குலுங்கிக்கொண்டு இருந்தன. என்ன செய்வது, அந்த நரிக்கு நீச்சல் தெரியாதே.... ஏக்கத்தோடு பழங்களைப் பார்த்துக்கொண்டு இருந்தது ...
மேலும் கதையை படிக்க...
ஊரில் அனைவருக்கும் அந்தத் துறவியைப் பிடிக்கும். ஊரின் ஒதுக்குப்புறத்தில் ஒரு சிறிய குடிசையைப் போட்டுக்கொண்டு தன் சிஷ்யனோடு எளிமையாக வாழ்ந்துவந்தார். தன்னைத் தேடி வருபவர்களுக்கு நல்ல கருத்துகளைச் சொல்லி ஆசீர்வதிப்பார். ஒரு நாள் அவர் தியானம் செய்துகொண்டு இருந்தார். அப்போது அவரது மனக்கண்ணுக்கு ...
மேலும் கதையை படிக்க...
நாடோடிக்கதை வரிசை-19: மணிப்பூர் அந்தப் பெண்ணுக்கு ஒரே மகன்தான். பிறர் வீடுகளில் பாத்திரம் தேய்த்து வாழ்க்கை நடத்தி வந்தாள். ஒருமுறை ஒரு வீட்டில் தானியம் அரைத்துக் கொடுத்தாள். பதிலுக்கு அவளுக்குக் கொஞ்சம் தானியம் கிடைத்தது. அதை விற்பதற்காக சந்தைக்குப் புறப்பட்டாள். ‘‘மகனே, உனக்கு ...
மேலும் கதையை படிக்க...
ஒரு பண்டிதர் ஒரு வயல் வழியாகப் போய்க் கொண்டிருந்தார். வாய்க்குள் ஏதோ இருப்பதுபோல் தோன்றவே, காறித் துப்பினார். ஒரு சிட்டுக்குருவியின் இறகு வந்து விழுந்தது. அது எப்படி தன் வாய்க்குள் வந்தது என்று அவருக்குத் தெரியவில்லை. வீட்டுக்கு வந்து தன் மனைவியிடம் ...
மேலும் கதையை படிக்க...
ஒரு விவசாயி தன் குடும்பத்தோடு நகரத்தை நோக்கிப் போய்க்கொண்டு இருந்தார். பயணத்தின் இரண்டாவது நாள் மதியம் அவர்கள் ஒரு பெரிய ஆலமரத்தைப் பார்த்தார்கள். அதன் கீழ் சற்று நேரம் ஓய்வெடுக்க நினைத்தார்கள். சும்மா உட்கார்ந்திருக்கும் நேரத்தில் கயிறு திரிக்கலாமே என்று நினைத்தார் விவசாயி. ...
மேலும் கதையை படிக்க...
நாடோடிக் கதை வரிசை-21 (தமிழ்நாடு) மரத்தின் மீது அமர்ந்து இனிய குரலெடுத்துப் பாடிக்கொண்டு இருந்தது குயில். அதன் தொண்டையில் இருந்து வெளிப்பட்ட குக்கூ, குக்கூ என்ற இசை, கானகம் எங்கும் பரவியது. அந்த மரத்தின் அருகில் ஒரு குட்டை இருந்தது. அதில் ...
மேலும் கதையை படிக்க...
குரங்குக் கூட்டம் ஒன்று ஒருநாள் உண்ணாவிரதம் இருக்க முடிவு செய்தன. ‘‘உண்ணாவிரதத்தைத் தொடங்குவதற்கு முன்னால், ஒரு காரியம் செய்யவேண்டும். விரதத்தை முடிக்கும்போது சாப்பிடுவதற்கான உணவை முதலிலேயே தயாராக வைத்துக் கொள்வோம்’’ என்றது கிழட்டு தலைமைக் குரங்கு. மற்ற குரங்குகளும் தலையசைத்து அதை ஆமோதித்தன. உணவு ...
மேலும் கதையை படிக்க...
நாடோடிக்கதை வரிசை-23 ஹரியானா மாநிலம் அந்த விவசாயி தன் தொழிலின் மேல் மிகவும் ஆர்வம் கொண்டவர். எந்த நேரமும் வயல்காடே கதி என்று கிடப்பார். தன் வயல், தோட்டம் ஆகியவற்றின் ஒவ்வொரு அங்குலமும் அவருக்கு அத்துப்படி. விவசாயத்தில் புதிது புதிதாக ஏதாவது செய்துகொண்டே இருப்பார். ...
மேலும் கதையை படிக்க...
கட்டிக்கோ!
பன்றியைக் கொன்று விடு!
இது போச்சு… அது வந்தது… டிரம்..டிரம்..டிரம்!
பறவைகள் படைப்பவன்!
யாரை கட்டிப்போடுவது?
பாட்டுப் பாடவா…
குரங்குகளின் உண்ணாவிரதம்!
எடு, என் பங்கை!
நாடோடிக்கதை வரிசை-23

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Enable Google Transliteration.(To type in English, press Ctrl+g)