விளையாட்டுப் பிள்ளை

 

எதிரி விண்கலங்கள் பூமியை நெருங்கிவிட்டன. கரிய வானத்தில் நட்சத்திரப் பின்னணியில் அவை ஜொலித்தன. ஒவ்வொன்றும் நூறு மைல் நீளமுள்ள ராட்சச விண்கப்பல்கள். பூமியின் போர்க் கலங்கள் குட்டி பொம்மைகள் மாதிரி அவற்றின் இடையில் புகுந்து புறப்பட்டு வீரமாகச் சண்டை போட்டன. எதிரி வீசும் ப்ரோட்டான் கதிர்களில் சிக்காமல் அவை நாலாபுறமும் குட்டிக் கரணம் போட்டுத் தப்பித்தன. நடுநடுவே ஒன்றிரண்டு அடிபட்டு நெருப்புப் பந்தாக எரிந்து தூசிக் குவியலில் காணாமல் போயின.

வீடியோ விளையாட்டு கன்ஸோலைக் கீழே எறிந்துவிட்டு ஒரு சாக்லெட்டை உரித்து வாயில் போட்டுக் கொண்டான் நிக்கு. பத்து வயதுதான் ஆகிறது. பயல், படு சுட்டி. விண்வெளி பற்றியும் நட்சத்திரங்கள் பற்றியும் அவன் கேள்விகளுக்கு பதில் சொல்ல பள்ளிக்கூடத்திலேயே ஆசிரியர்கள் இல்லை. ‘இளம் விண்வெளி விஞ்ஞானி ‘ தேர்வில் முதலாவதாக வந்து நாஸாவிலிருந்து தங்கப் பதக்கம் வாங்கியிருக்கிறான். விடுமுறை விட்டாயிற்றென்றால் தினம் பத்து மணி நேரம் வீடியோ கேம்!

அதனால்தான் இப்போது உலகத்தைக் காப்பாற்ற அவனைத் தேர்ந்தெடுத்திருக்கிறார்கள்.

‘நிக்கு நிக்கு, ப்ளீஸ். விளையாட்டை நிறுத்தாதே. அதோ பார் எதிரிகள் லேசர் பீரங்கியை எடுத்து விட்டார்கள். நாமும் பதிலடி கொடுக்க வேண்டாமா ? ‘ என்று கெஞ்சினார் ஜெனரல். அவர் நெற்றியில் முத்து முத்தாக வியர்வைத் துளிகள்.

‘அவ்வளவுதானே ? இப்போ பாருங்க அங்கிள். ‘ நிக்குவின் சின்ன விரல்கள் திறமையாக ஜாய் ஸ்டிக்கை இயக்க, திரையில் போர் விமானம் செங்குத்தாக மேலே போய் ஒரு வட்டமடித்துத் திரும்பியது. வேகம், தூரம், நேரம் போன்ற ஏழு பரிமாணங்களை அவன் ஒரே சமயத்தில் கணக்கிட்டு சரியான கணத்தில் ப்ளாஸ்மா டார்பிடோவை விடுவித்தான்.

வீடியோ திரை கொள்ளாமல் ஒரு மகா வெடிப்பு. சிதறல். நெருப்புத்தீற்றல். எந்த சூப்பர் கம்ப்யூட்டராலும் முடியாத அதிவேகக் கணக்கை அவன் மூளை எப்படித்தான் போட்டதோ….எதிரி விமானங்களில் நாலில் ஒரு பங்கு காலி! ஜெனரல் கண்ணீருடன் சிரித்து வானத்தை நோக்கி முஷ்டியை உயர்த்தினார்.

‘அங்கிள், பாத்ரூம் போயிட்டு வந்து விளையாடறேன். ‘

‘சீக்கிரம் வா. சுவாரசியமான கட்டம். ‘

ஜெனரலுக்கு மட்டும்தான் தெரியும், இது விளையாட்டில்லை, நிஜம். திடாரென்று ஒரு நாள் ஆண்ட்ரோமீடாவிலிருந்து புற்றீசல் போல் புறப்பட்டு வந்துவிட்டார்கள் வேற்று கிரகவாசிகள். அவர்களின் மூளைக்கும் திறமைக்கும் போர்த் தந்திரங்களுக்கும் ஈடுகொடுக்க யாராலும் முடியாமல், தோல்வி மேல் தோல்வி. வழக்கமான போர் முறைகளில் பழகிப் போய்விட்ட ராணுவ அதிகாரிகளால் வித்தியாசமாகச் சிந்திக்கவோ, விரைவில் செயல்படவோ முடியாது என்பது தெளிவாகத் தெரிந்து விட்டது. இனி பூமியைக் காப்பாற்ற ஒரு கடைசி முயற்சி செய்து பார்க்க வேண்டியதுதான் என்று ஜெனரல் முடிவெடுத்தார். மொத்த விண்வெளிப் படையின் கட்டுப்பாட்டையும் ஒரு புத்திசாலியான சின்னப் பையனின் கைகளில் கொடுப்பதற்கு உலக அரசாங்கத்திடம் மன்றாடி அனுமதி வாங்கிவிட்டார். பொடியன் கைகளில் ஆணை போனதும் அவன் அடித்து தூள் பறத்துகிறான்! முதல் தடவையாக எதிரிப் படைகள் திணறுகிறார்கள். சிறுவனாகையால் அவன் பயந்துவிடக் கூடாது என்பதற்காக எல்லாம் விளையாட்டு என்று சொல்லி வைத்திருக்கிறார் ஜெனரல்.

அரை டிராயர் பொத்தானைப் போட்டபடியே வந்தான் நிக்கு. ‘இந்த விளையாட்டில் ஒரு தப்பு இருக்கிறது அங்கிள். ‘

‘என்னது ? ‘

‘விண்வெளியில்தான் காற்றே கிடையாதே…பின்னே எப்படி எதிரி விமானமெல்லாம் எரிந்து சாம்பலாகிறது ? ‘

‘அவர்களுடைய விமானத்தின் வெளிப்புறமெல்லாம் மக்னீஷியத்தினால் செய்தது. அவர்களோ கார்பன்-டை-ஆக்ஸைடை சுவாசித்து ஆக்ஸிஜனை வெளியிடுபவர்கள். லேசாக ஒரு ஓட்டை போட்டால் போதும்; ஆக்ஸிஜன் வெளியே கசிந்து மக்னீஷியத்தின் மீது பட்டாலே புஸ்வாணம்தான்! ‘

‘அப்படியா,.. சரி நாம் பம்பரம் விடலாம் ‘.

‘அய்யய்யோ! முதலில் இந்த விளையாட்டை முடிக்கவேண்டும். அப்புறம் பம்பரம். ‘

‘ஊகூம். போரடிக்கிறது. ‘

அவன் தாடையைப் பிடித்துக் கொண்டு ‘நிக்கு, என் கண்ணில்லை ? நீ மட்டும் எதிரிப் படையை அழித்து விட்டால் ராட்சச கோன் ஐஸ் க்ரீம் வாங்கித் தருகிறேன். ‘

நிக்கு யோசித்தான். ‘ஸ்ட்ராபெர்ரி ஐஸ் க்ரீம். எனக்கு வனில்லா பிடிக்காது. என் வகுப்பிலேயே ராகுல் மட்டும்தான் வனில்லா சாப்பிடுவான். ‘

‘சரி, சரி. ஸ்ட்ராபெர்ரி. ‘ இந்த விளையாட்டில் மட்டும் ஜெயித்தால் ஐஸ் க்ரீம் பாக்டரியே உன்னுடையதுதானே பையா!

‘திரும்பி வருகிறார்கள் பார். படு கோபத்தில் இருக்கிறார்கள். ஜாக்கிரதை. ‘

‘பூ! அந்தப் பசங்களை இதோ கலக்குகிறேன் பாருங்க. ‘ நிக்குவின் விரல்கள் புயலால் செய்த வண்ணத்துப் பூச்சி போல் கம்ப்யூட்டரை இயக்க, மொத்த விண்வெளிப் படையும் ஒரு முகமாகச் சுழன்று திரும்பி ஒரு புள்ளியை நோக்கிப் புறப்பட்டது.

‘டேய் டேய், என்ன செய்கிறாய் ? ‘

‘இதே திசையில் நம் விமானங்கள் சென்றால் சூரியனின் கரோனா என்கிற வெளிப்புற நெருப்புப் பிழம்பின் வழியாகப் புகுந்து போகும். ‘

‘போனால் ?… ‘

‘எதிரிப்படை இப்போது பழிவாங்கும் கோபத்தில் இருப்பதால் துரத்திக் கொண்டு பின்னால் போவார்கள். ‘

‘அவர்களுடைய மக்னீஷியம் விமானங்கள் எரிந்து போய்விடும் ?.. ‘

‘கரெக்ட்! நம்முடைய விமானங்களெல்லாம் அந்த சூட்டைத் தாங்கக் கூடிய பாலிமரால் செய்யப் பட்டது. கவலையில்லை. ‘

‘சூரியன் வரை போய்த் திரும்பி வருகிற அளவுக்கு நம்மிடம் எரிபொருள் கிடையாது ‘ என்றார் ஜெனரல் இறுக்கமான முகத்துடன்.

‘எரிபொருளே தேவையில்லை. சூரியனின் ஈர்ப்பு விசையால் இழுக்கப் பட்டு பூமராங் மாதிரி போய்த் தானே திரும்பிவரும். கவண் கல் எஃபெக்ட்! ‘

ஜெனரலுக்கு மறுபடி அடக்க முடியாமல் கண்ணீர் வந்தது.

அடுத்த அரை மணி நேரம் நகத்தைக் கடிக்கும் மெளனத்தில் கழிந்தது. நிக்கு காதில் வாக்மேன் பொருத்திக் கொண்டு மெல்ல நடனமாடிக் கொண்டு கேக் தின்றுகொண்டு பூனைக் குட்டியைத் தரதரவென்று இழுத்துக் கொண்டு க்ரேயானால் சுவரில் படம் வரைந்து கொண்டு உற்சாக மூட்டையாக இருந்தான். ஜெனரல் போலவே மீசைக்காரப் படம்!

விமானங்கள் வேகமாக சூரியனின் நெருப்பு நாக்குகளின் நடுவே புகுந்தன.

‘பார் பார். அவர்கள் வந்த வேகத்தில் திசை திருப்புவதற்கு நேரமில்லை. டூ லேட்! ஜோதியாக எரிகிறார்கள் பார், ஒன்று, இரண்டு, மூன்று! ‘

எதிரி விமானங்கள் கொசு மாதிரி பொசுங்கிப் போவதைக் கண்டு ஜெனரல் கூத்தாடினார்.

‘நம்முடைய விமானங்கள் எங்கே ? ‘

‘சூரியனைச் சுற்றிக் கொண்டு திரும்பி வருகின்றன. நேராக பூமியை நோக்கி வரும்படி பாதையை அமைத்திருக்கிறேன். ‘

‘திருப்பு, திருப்பு! பூமியின் மேல் மோதிவிடப் போகிறது. ‘

‘மோதினால் என்ன ஆகும் ? ‘

‘பூமியே இருக்காது. அணு குண்டுகள் பொருத்திய டஜன் கணக்கான விமானங்கள் அந்த வேகத்தில் வந்து மோதினால்… ? உடனே திருப்பு எல்லாவற்றையும்! ‘

‘திருப்பும் அளவுக்கு எரிபொருள் இல்லை. சூரியன் இழுத்து விட்டதில் பத்து ஜி அளவுக்கு ஆக்ஸிலரேஷன் எகிறிவிட்டது. ‘

ஜெனரல் முகத்தில் கலவரத்தைப் பார்த்து சிரித்தான் நிக்கு. ‘கமான் அங்கிள். வெறும் விளையாட்டுத்தானே ? ‘ என்று ஒரு பாப் கார்ன் பாக்கெட்டைப் பிரித்துக் கொண்டே சொன்னான்.

- அறிவியல் கதை – விளையாட்டுப் பிள்ளை (மூலம் : மைக்கேல் ஸ்வான்விக்)
தமிழில் : ராமன் ராஜா (மார்ச் 2005)

(மைக்கேல் ஸ்வான்விக் எழுதிய Under ‘s Game என்ற சிறுகதையின் இளகிய தமிழ் வடிவம். இவர் எழுதியுள்ள தனிம வரிசை அட்டவணை அறிவியல் கதைகள்தொடரில் மக்னீஷியத்தை மையமாகக் கொண்டு எழுதிய கதை இது.) 

தொடர்புடைய சிறுகதைகள்
மனநல மருத்துவர் டாக்டர். சிவகுருநாதன் காரை விட்டு இறங்கி கைப் பெட்டியுடன் ஏதோ சிந்தனையில் திவ்யா மல்டி ஸ்பெஷாலிட்டி ஹாஸ்பிட்டலின் உள்ளே நுழைந்தார். அந்த பல்நோக்கு மருத்துவமனையில் அவருக்குரிய ஆலோசனை அறையை அடைய வரவேற்பறையைத் தாண்டித்தான் கடந்து செல்ல வேண்டியிருந்தது. அவரது ...
மேலும் கதையை படிக்க...
அதிகாலையிலேயே முருகேசனுக்கு விழிப்பு வந்துவிட்டது. அதிகாலை என்றுதான் நினைத்தான். ஆனால், ஜன்னல் வழியே வந்த வெளிச்சம் சூரிய ஒளி அல்ல; தெருவிளக்கின் பிரதிபலிப்பு என்று தெரிந்தவுடன் செல்போனை எடுத்து மணி பார்த்தான். இரண்டரை. எழுந்தான். எழுந்திருக்க முடியவில்லை. கால்களில் யாரோ சங்கிலியால் ...
மேலும் கதையை படிக்க...
என் மடியில் தலைவைத்து உறங்கிக்கொண்டிருந்தாள் என் பத்து வயது மகள் டிமோ. மணி இரவு பன்னிரெண்டை தாண்டியிருந்தது. ஜன்னல் வழியே சில்லென்ற காற்றும், ஏதோவொரு பூவின் வாசமும் மிதந்து வந்தது. நான் மிகுந்த குழப்பத்திலிருந்தேன். இரண்டு நாட்களாய் மண்டைக்குள் குடைச்சல். என் ...
மேலும் கதையை படிக்க...
அருண்! நிறைய இடம் பார்த்தாச்சு, நீயும் அதை இதை சொல்லி தட்டி கழிச்சிக்கிட்டே இருக்கே, நாங்களும் உனக்கு பெண் தேடி அலுத்திட்டோம். இன்றைக்கு பார்க்கப் போகிற இடத்திலாவது உனக்கு ஏற்றவளா அமையனும்னு நான் வேண்டாத தெய்வமில்லை. நான் சொல்கிறதை கேளு, கொஞ்சம் ...
மேலும் கதையை படிக்க...
(காதலுக்காக ஏங்குவதும், காத்திருப்பதும், கிடைக்காமல் போனால் மனம் உடைந்து போவதும்…! தோல்விகள் எல்லாம் தோல்விகளுமல்ல, வெற்றிகள் எல்லாம் வெற்றிகளுமல்ல...!) அன்று பௌர்ணமி. மொட்டை மாடியில் நின்று உன் எழில் கொஞ்சும் அழகைப் பார்த்து ரசித்துக் கொண்டிருந்;தேன். கண்ணுக்குள் ஆயிரமாயிரம் கதைகள் சொல்லி என் ...
மேலும் கதையை படிக்க...
அடையாளம்
காலா… அருகே வாடா
ஏலியன்
மாமனாரைப் பிடிக்கல…
இங்கேயும் ஒரு நிலா!

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Enable Google Transliteration.(To type in English, press Ctrl+g)