மனைவியைத் தழுவும்போது…

 

எப்படியோ லாரிக்காரரைக் கெஞ்சி சாக்கு மூட்டையின் மீது இடம் பிடித்து உட்கார்ந்தான். அவனைப் போல இன்னும் இரண்டு பேர் அந்த லாரியில் ஏறியிருந்தார்கள்.

“பொளுது விளறதுக் குள்ளாற காங்கயம் போயிறலாமா, ஏனுங்க?” பக்கத்திலிருந்த வரைக் கேட்டான்.

“ஆருது, அம்புட்டு நாளி எதுக்கு? உச்சிக்கே சேந்துடலாங்க!”

இவன் தலையைச் சொறிந்து கொண்டான். வழியில் கொங்கு ஆண்டவர் மலைக்கோயில் மணியோசை காற்றில் மிதந்து வந்தது. “இன்னிக்கு வெள்ளி. அதான் பூசை நடக்கு. நமக்குக் கூட ஒரு நேர்த்திக் கடன் இருக்கு. ஆடு வெட்டிப் பலி தரோணும். குண்டடம் சந்தையில ஆனை விலை சொல்றாங்க. பத்து கிலோ மெதப்பு கடா ஒண்ணு பாத்தேன். வர்ற வாரத்துல வாங்கிடலாமுன்னு திரும்பிட்டேனுங்க..”

பக்கத்தில் இருந்தவர் ஒரு பீடியை எடுத்து லாவகமாகப் பற்றவைத்து ஊதினார். இவனைப் பார்த்து நீங்க? என்று கேட்டு ஒரு பீடியை நீட்டினார்.

“பீடிப் பளக்கம் இல்லீங்க.”

இவன் சிரித்துக் கொண்டான். அவள் இந்த மூன்று நாளில் என்னமாய் கவலையும் ஆத்திரமும் கொண்டிருப்பாள் என்று எண்ணியவனே போன்று லாரியைப் பின் தொடர்ந்து வரும் வாகனங்களைப் பார்த்தான். லாரி சீராக உறுமியபடி சாலையில் விரைந்தது.

நான்கு தினங்களுக்கு முன் அவளுக்கும் இவனுக்கும் சண்டை வந்தது. “காட்டுல போயலை போட்டால், கொடுவாய் மொதலாளி அதிகமாப் பணம் தர்றாங்களாம்” என்றாள் அவள்.

“போயலையா? என் பாட்டன், பூட்டன் காலத்திலிருந்தே போயலை நடற பளக்கம் இல்லியே பாப்பாத்தி!”

“பின்னே?”

“பருத்தி போடலாம், சோளம், ராகி… இல்லாட்டி கம்பு, நெலக்கடலை எதுனா போடலாம்..”

பாப்பாத்திக்கு வாய் நிறைய வெற்றிலை போட்டு, கன்ன உள்ளோட்டில் புகையிலையைப் பதமாய் எந்நேரமும் அடக்கிக் கொண்டிருக்க வேண்டும்… “ஏன், போயலை போட்டா என்னா வந்துச்சு? எலை வளர்ந்தப்புறம் கொடுவாய் பாக்டரியிலேர்ந்து லாரியைக் கொணாந்து அவங்களே அரத்துகிட்டுப் போயிடறாங்க. கைமேல காசு. அதை விட்டுப் போட்டு…”

இவன் அவளை முறைத்துப் பார்த்தான். “நீ என்னாடி எதுத்துப் பேச ஆரம்பிச்சுட்டே? ஒண்ணு வயித்துக்கு ஆவணும். இல்ல, மேலே போட்டுக்க துணி மணியாகணும். போயலை எதுக்குடி ஆகும்? சுருட்டுக்கும் பீடிக்கும்தானே? எம்மட காட்டுல போயலை போட நாந் தயாரில்ல சாமி.. ஆளை வுடு!”

இவன் பருத்தியும் ராகியும், தென்புறம் கொஞ்ச நிலத்தில் நிலக்கடலையும் பயிரிட ஏற்பாடுகளைச் செய்து விட்டான்.

விஷயம் சிறிதானாலும் பாப்பாத்திக்குக் கணவன் மேல் கோபம் தணியாமலே இருந்தது. ராகிக் களியும் கத்தரிக்காய் பொரியலும் செய்து வைத்துவிட்டு மூலையில் சுருண்டு கொண்டாள்.

பெரிய மகள் மீராவும் அடுத்தவள் சுந்தரியும் தகப்பனுக்கு மதியம் சாப்பாடு எடுத்து வந்தபோது அவனிடம் விஷயத்தைச் சொன்னார்கள். கபிலையிலிருந்து மாடுகளை அவிழ்த்து வேகமாய் அடித்து விரட்டினான் இவன்.

“வர வர ஒங்க அம்மா அடம் பிடிக்கிறா. நா நேத்து வந்த பழனி கெவுர்மெண்டு ஆஸ்பத்திரி ஜீப் காரங்களோட போயிடுவேன்னு சொல்லிடுங்க ஆத்தா… சொல்றீங்களா?”

பத்து வயது மீராவும், எட்டு வயது சுந்தரியும் தலையை ஆட்டிவிட்டு வீட்டுக்குப் போனார்கள்.

மனைவியுடன் சண்டை வந்து விட்டாலே இவனுக்கு நடுக்கம்தான். சண்டை குறித்த அச்சம் அல்ல, அப்புறம் சமாதானம் செய்கிறபோது… இவனுக்கு நன்றாகத் தெரியும் அவளுக்கு என்ன தேவை என்று.

பெற்றது ஐந்தும் பெண் குழந்தைகள். ஆறாவது ஒன்று உருவானால் அதுவாவது ஆணாக அமையாதா என்பது அவள் கனவு. அதுவும் பெண்ணாகப் பிறந்து விட்டால்..? – இவன் பயம், சந்தேகம். இவனுடைய விரதத்தை உடைப்பதற்காக சிறு சிறு சச்சரவுகளையும் பெரிதாக்கி, தன்னைச் சமாதானப் படுத்த அவன் கீழிறங்கி வர வேண்டும் என்பது அவள் நினைப்பு. அப்படிச் சமாதானங்களின் முடிவு, இவனுடைய வீழ்ச்சியாக.. விடுபட முடியாத தழுவலாக…

பண்ணைக்கார மூப்பனிடம் சில நாட்களுக்கு காட்டைப் பார்த்துக்கொள் என்று ரகசியமாகக் கூறிவிட்டுப் பயணப்பட்டு விட்டான்.

நாற்பது கிலோ மீட்டர் தொலைவில் பழனி அரசாங்க ஆஸ்பத்திரியிலிருந்து ஜீப்பில் மைக், விளம்பர அட்டை கட்டி ஊர் ஊராக, வீதி வீதியாகத் தேடிவந்து கூப்பிட்டார்கள். முன்பெல்லாம் அடிக்கடி இப்படி முகாம்கள் நடக்கும். இப்போது அதிசயமாய் எப்போதாவது முகாம் நடத்துகிறார்கள். ஜீப் தேடி வந்து அழைத்தபோது மறுத்தவன், தானாகவே சென்று தன் சம்மதத்தைச் சொன்னான்.

இவனுக்கு அங்கே ராஜ மரியாதை. கையில் ஊசி போட்டார்கள்.

ஒரு அறைக்குள் அழைத்துப் போனார்கள். படுக்கச் சொன்னார்கள். மேலே பல்ப் வெளிச்சம் கண்ணைக் கூசியது. “வலிக்குமுங்களா?” என்று கேட்டான்.

“எறுப்பு கடிக்கிற வலியை உன்னால் பொறுத்துக்க முடியாதா? சின்ன ஆப்பரேஷன் தாம்ப்பா!”

கொங்கு ஆண்டவர் சாமியையும் பழனி ஆண்டியையும் துணைக்குக் கூப்பிட்டான்… “வல்ல பூதம் வலாஷ்டிகப் பேய்கள், அல்லற்படுத்தும் அடங்கா முனிகள், பிள்ளைகள் தின்னும் புறக்கடை முனியும்..” என்று எப்போதோ பாட்டன் சொல்லிக் கொடுத்த கந்த சஷ்டிக் கவசத்தை முணுமுணுத்தான்.

“அவ்வளவுதான், எழுந்திரு. ஒரு சின்ன ஆப்பரேஷனுக்கு ஒலகத்து சாமியயெல்லாம் கூப்பிடறியே..?” டாக்டரின் பக்கத்தில் நின்ற வெள்ளையுடுப்பு நர்ஸ் சிரித்தாள்.

“அவ்ளோதானுங்களா? ரொம்ப வலிக்கும்னு சொன்னாங்களே?” இவனுக்கு ஆச்சரியம்.

“இந்தா ரூபாய்… நல்லா எண்ணிப் பார்த்துக்கோ… இதோ இங்கே ஸ்டாம்பு மேலே கையெழுத்து போடத் தெரியுமா, இல்லே..?”

“தற்குறிதானுங்க” இவன் சிரித்தான். இடது கை பெருவிரல் ரேகை பதித்து விட்டு ரூபாயை வாங்கி வேட்டி மடிப்பில் பத்திரமாக வைத்துக் கொண்டான்.

“இங்கியே முகாம்ல ரெண்டு நாள் இருக்கலாம். சாப்பாடு, முட்டை எல்லாம் இலவசமாத் தருவோம். ஒருவாரத்துக்குக் காயத்துல தண்ணி படாம கவனமா இருந்துக்கோ. இப்பல்லாம் தையல் பிரிக்கற வேலை கிடையாது. அப்சார்பிங் கேட்கட்தான்..”

“ஆவட்டுமுங்கோ”

“இரண்டு தினங்கள் கழித்து நீ வீட்டுக்குப் போகலாம்ப்பா. இன்னும் ஒரு மாசத்துக்குக் கனமா எதையும் தூக்கக் கூடாது. சைக்கிள் விடக்கூடாது… அப்புறம்… பொண்டாட்டி படுத்திருக் கிற பாயில நீயும் படுக்கப்படாது…என்ன?” என்றார் டாக்டர், கண்சிமிட்டி.

“அர்த்தம் ஆச்சுங்க. இனிமே உடம்புக்குத் தண்ணி வாக்கலாமுங்களா? மூணு நாளாக் குளியலே போடலீங்களே?”

“வீட்டுக்குப் போய் அண்டா நெறயத் தண்ணி கொதிக்க வெச்சு, உடம்பை அதில் நல்லா ஊறப்போடு. போ!” நர்° கேலி செய்து சிரித்தாள். எல்லோருக்கும் கும்பிடு போட்டுவிட்டு ஆஸ்பத்திரியை விட்டு வெளியே வந்தான்.

மெல்ல நடந்தான். சற்றுத் தொலைவில் ஒரு டாஸ்மாக் கடை வாசலில் அவனோடு ஆஸ்பத்திரியிலிருந்து ஆப்பரேஷன் முடிந்து அனுப்பப்பட்ட சிலர் நின்றிருந்தார்கள். ஆஸ்பத்திரி பழக்கத்தில், சிநேகத்தில் ஒருவன் கையை ஆட்டி இவனைக் கூப்பிட்டான். “வாங்க கட்டிங் போட்டுட்டுப் போலாம்!”

“வேண்டாமுங்க. நமக்குப் பளக்கம் கெடையாது!” இவன் உறுதியாக மறுத்து, மேலே போனான். வெய்யில் ஏறி வந்தது.

ஏதோ மூட்டைகள் ஏற்றி நின்ற ஒரு லாரி டிரைவரிடம் கேட்டு லாரி ஈரோடு போவதைத் தெரிந்து கொண்டான். “காங்கயம் வரைக்கும் வரலாமுங்களா?” என்று கேட்க, “பஸ் சார்ஜைக் கொடுத்தால் போதும்… ஏறிக்கோ” என்றார் டிரைவர்.

பிற்பகலில் காங்கயம் கரூர் கூட்டு ரோட்டில் லாரியிலிருந்து இறங்கி டிரைவரிடம் பணம் கொடுத்துவிட்டு குறுக்குச் சாலையில் வீட்டை நோக்கி நடந்தான்.

தயக்கமும் பயமும் இவனை அலைக்கழித்தன. அவளுடைய ஆங்காரத்துக்கு என்ன பதில் சொல்வது என்று குழம்பினான். ஆங்காரத்துக்குப் பதில், ஓவென்று கதறி அவன் காலடியில் விழுந்தாள் அவள்.

“நா எதுனா தப்புப் பண்ணியிருந்தா என்னை சீவக் கட்டையால போடறதை விட்டுட்டு இப்பிடி சொல்லிக்காம நீங்க போகலாமா?”

அவள் இவனைத் தழுவிக் கொண்டு அழுதாள். இவன் ஆறுதலாகத் தட்டிக் கொடுத்தான். திடீரென்று ஞாபகம் வந்தவளாய் “எங்கே போயிருந்தீங்க?” எனக் கேட்டாள்.

“பல்லடத்துக்கு… என்ற சின்னாயி வீட்டுக்கு. ”

“அப்பாடா!… இப்பத்தான் எனக்கு நல்ல மூச்சு வந்துச்சு. அந்த ஆஸ்பத்திரி ஜீப்புல வந்தவங்களோட போய் குடும்பக் கட்டுப்பாடு ஆப்பிரேசன் செஞ்சுகிட்டீங்களோன்னு துடிச்சுப் போயிட்டேன். லச்ச ரூவா கொடுத்தாலும் நமக்கு அந்தக் கருமம் வேணாம் சாமி. இன்னும் பத்துப் பிள்ளைங்க பெத்தாலும் நானே காட்டு வேலை செஞ்சு கஞ்சி ஊத்த உடம்புல தெம்பு இருக்கிறப்போ கட்டுப்பாடும் கண்றாவியும் என்னத்துக்கு…? சே!”

இவன் சிரித்தபடியே அவள் தழுவலில் இருந்து மெல்ல விலகிக் கொண்டான். “இன்னும் ஒரு மாசம் இவகிட்டேருந்து தப்பியாகணும்டா சாமி..!” எனறு முனகியபடியே வாசலுக்கு வந்தான்.

எங்கோ விளையாடித் தெருப்புழுதியை மேலெல்லாம் அப்பிக் கொண்டு வந்த இவனுடைய ஐந்து செல்வங்களும், “அப்பா! அப்பா!” என்று சுற்றிக் கொண்டன.

(தேன்மழை மாத இதழ்) 

தொடர்புடைய சிறுகதைகள்
முன் மண்டையில் இரத்தம் பீறிட்டு நெற்றி, முகம், கன்னம் யாவும் வழிய வழிய அந்தப் பதினைந்து வயதுச் சிறுவனை சாம்பலான் தூக்கி வந்து டாக்டர் வீட்டு வராந்தாவில் இருந்த பெஞ்சில் கிடத்திவிட்டு, ``சாமி! சாமி!'' என்று உரக்கக் கூவினான். அவன் கூச்சலினால், டாக்டர் ...
மேலும் கதையை படிக்க...
நிலக்கடலைக் காட்டில் ஐந்தாறு பெண்கள் நிலக்கடலைச் செடியைக் கொத்துக் கொத்தாகப் பிடுங்கிக் கொண்டிருந்தார்கள். நல்ல முற்றின கொட்டைகள். ``இந்தப் பூமிக்கு நிலக்கடலை நல்லா வெளையும்... இந்த வச எச்சாவே வெளைச்சல் கண்டிருக்கு'' என்று வரப்பில் மீசையை முறுக்கியபடி நின்று சொன்னார் ராமசாமி ...
மேலும் கதையை படிக்க...
``ஆபீசர் வீட்டு அம்மா உங்களைக் கையோடு அழைச்சுகிட்டு வரச் சொன்னாங்க!'' பியூன் சின்னமணி வந்து சொன்னதும் பங்களாவை ஒட்டிய அவுட் ஹவுஸில் ஒரு ஃபைலைப் புரட்டிக் கொண்டிருந்த காம்ப் கிளார்க் வைத்திக்கு வயிற்றில் புளியைக் கரைத்தது போலிருந்தது. பரபரப்புடன் எழுந்தான். பவ்யமாக பங்களாவுக்குள் அடியெடுத்து வைத்தவன் ...
மேலும் கதையை படிக்க...
சட்டிகள், பானைகள், கரி பிடித்து ஒடுக்கு விழுந்திருந்த பெரிதும் சிறிதுமான அலுமினியப் பாத்திரங்கள் சகிதம் தாமரைப் பாளையம் மற்றும் அக்கம் பக்கத்து ஊர்க்கோடி வளவுகளில் இருந்து நண்டும் குஞ்சுகளுமாகக் குடும்பங்கள் மலைக் கன்னியாத்தா கோயிலை நோக்கி நடக்கத் தொடங்கி விட்டன. ``வவுத்துப் புள்ளக்காரி, ...
மேலும் கதையை படிக்க...
வெயிலில் சுற்றி அலுத்து வீடு திரும்பினான் விசுவம். அம்மாவை அடுப்படியில் பார்த்ததில் சந்தோஷம் கொண்டான். அடுப்பில், பாத்திரத்தில் அரிசி கொதித்துத் துளும்பிக் கொண்டி ருக்கும் காட்சியை நின்று பார்த்தபடி மெல்லக் கேட்டான்: ``அப்பா வந்துட்டாராம்மா?'' ``இல்லைடா விசு, பத்தர் வீட்டுப் பொம்பிளைகிட்ட ஒரு படி ...
மேலும் கதையை படிக்க...
எல்லோருக்கும் சம்பளம் கொடுத்து முடிய இரவு எட்டு மணி ஆகி விட்டது. வழக்கத்தை விட அன்று ஒருமணி நேரம் தாமதம் என்று உணர்ந்தான் சதீஷ். அது ஒரு ரெண்டுங்கெட்டான் ஊர். கிராமமும் இல்லை, பெரிய டவுனும் இல்லை. அந்த மாதிரி சின்னச் சின்ன ...
மேலும் கதையை படிக்க...
கிட்டத்தட்ட பதினைந்து வருடங்கள் கழித்து, சொந்த ஊரான புதூருக்கு இவன் போன போது ஏகப்பட்ட மாற்றங்கள். ``மிஸ்டர் ராஜேஷ்! உங்க ஊருக்கு விசிட் போறேன். ஒருநாள் லீவு போட்டுட்டு வாங்களேன். காரில் ஜாலியாப் பேசிகிட்டுப் போன மாதிரியும் இருக்கும்; உங்களுக்கு ஒரு மாறுதலாகவும் ...
மேலும் கதையை படிக்க...
கூதல் காற்று சிலீரென்று முகத்தில் அறைந்தது. இருள் விலக இன்னும் வெகு நேரம் பிடிக்கும். மேல் துண்டால் காதுகளை மூடி முண்டாசு கட்டிக்கொண்டு பீடியைப் பற்ற வைத்தான் அம்மாசி. தம் உள்ளே போனதும் அலாதி சுறுசுறுப்புப் பெற்றவனாய் குடிசையின் படல் கதவைத் ...
மேலும் கதையை படிக்க...
பகீரென்றது. சென்னை ஹெட் ஆபீசிலிருந்து ஜெனரல் மேனேஜரே திடுதிப்பென்று என் மொபைலுக்கு ஃபோன் செய்வார் என்று கனவிலும் நினைத்ததில்லை. ``நான் ஜி.எம். பேசறேன் மிஸ்டர் பல்ராம்! எப்படி இருக்கீங்க?'' என்று அவர் கேட்டபோது, படபடப்பு. குப்பென்று வியர்த்தது. .. ``மிஸ்டர் பல்ராம், ...
மேலும் கதையை படிக்க...
``ஸார்!” ஜன்னலோரமாக உட்கார்ந்திருந்த கார்த்தியை பிளாட்பாரத்தில் நின்ற ஓர் இளைஞன் அழைத்தான்: ``ஸார் ட்ரிச்சினாப்பள்ளி போறாப்பிலியா?'' ``நோ, நோ!... மயிலாடுதுறை!'' ``அடடே, மாயவரத்துக்கா... ரொம்ப நல்லதாப்போச்சு! சுமதி! ஸார் மாயவரம் போறாராம்.. உன் கவலை எனக்கு விட்டுச்சு!'' என்றான் இளைஞன். இவன் பக்கம் திரும்பி, ``கைக் குழந்தையோடு ராத்திரி ...
மேலும் கதையை படிக்க...
புயலில் சில தனி மரங்கள்!
தாகம்
ஆபீசர் வீட்டு அம்மா
விருந்து
வயிறு
மசால் தோசை
முகங்கள்
அம்மாசியின் மனக் கணக்கு
சிங்கப்பூருக்கு சில கழுதைகள்
அந்த ரெயில் வண்டியில் ஒரு விபரீதம்…

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Enable Google Transliteration.(To type in English, press Ctrl+g)